Saad nga napakyas

Di gyud ko mosugot kun imo nang minusan akong gipangayo! Kinyentos mil akong danyos. Ug bayente mil matag bulang suporta nimo sa bata!" malagutong pulong ni Teddylyn Reyes ngadto ni Jerome Bertes, iyang kanhi hinigugma.

Naglingkod ug nagkugos siya’g batang lalaki, usa ka tuig ang edad, atubangan ni Jerome nga naglingkod sab, dikit sa lamesa ni Mr. Michael Damayo, Mediation Officer. Nag-abot ni sila karong sayong kahaponon sa opisina sa Mediation Officer sa Mandaue. Nipasaka si Teddylyn batok ni Jerome og kaso nga pangayo’g danyos kay wa katuman sa saad ug binulang suporta sa ilang anak.

"Di na madalag hangyo?" ni Jerome. Nitan-aw siya ngadtong Teddylyn ug sa iyang abogado nga si Atty. Allan Larrobis. Nagpalayo ang mga abogado’g lingkod. Kay gihatagan nilag higayon nga magsabotsabot ang mga nagburukahay. Si Atty. Larrobis hilom nga nakighinabi kang Atty. Rel Becalas nga abogado ni Teddylyn. Tua ang duha ka abogado nanglingkod sa bakanteng lingkuranan sikit sa laing lamesa, usa ka dupa ang gilay-on sa nahimutangan sa kihante ug sinumbong.

Usa ka seaman si Jerome. Biyahe'g overseas. Tersero opisyal pa lang siya. Apan dako nag sweldo. Singkwenta mil pesos ang bulan. Si Teddylyn nakahuman og Accountancy. Apan wala kakuhag board exams kay namabdos. Kaklase si Teddylyn ni Marivel manghod ni Jerome nga maoy nagpailaila nila. Duha ka tuig ilang panag-uyab. Unya namabdos sa pasalig si Teddylyn. Natumba ang bandera, kay nisaad si Jerome nga pakaslan siya inig balik niya sa Pilipinas. Nagtigom pa kono og kuwarta si Jerome sa biyahe niya sa gawas. Unya inig pauli pakasal dayon sila. Pagdunggo ni Jerome, lain iyang gipakaslan. Hapit naghikog si Teddylyn samtang tig-anakon. Apan nadala sa tambag-tambag sa mga paryente ug mga higala. Nisustiner. Gipakatawo ang bata. Unya nangunsulta’g abogado.

Duna siyay uyoan nga abogado nga ig-agaw sa iyang amahan nga si Edward. Gipaila siya ni papa niya ngadtong Atty. Becalas. Madasigon nga nitabang si Atty. Becalas.

"Unsa man Tiyo? Pahangyoon?" ni Teddylyn ngadtos iyang abogado. "Well, nia man tas Mediation Office aron magkaareglo. Wa may areglo kun way mahangyo. Kini imong kaso batok niya Damages due to breach of contract, which is the promise to marry and child support. Wa may fixed price ana sama sa Gaisano. Ingna siya paminawon kun pilay hangyo" ni Atty. Becalas.

"Admitido man kaha ka Jerome nga ikaw amahan anang Efren, kanang gikugos ni Teddylyn?" ni Atty. Larrobis." Admitido ko, sir. Kay nag-atubang man gyud mi paghimo namo sa bata. Dili parehas maghimog baktin nga nagtalikod ang anay" ni Jerome nga nangomedya pa gyud. Nakatawa ang Mediator. Hasta ang mga abogado.

"Sigi, pila man Jerome?" ni Teddylyn. Nipahiyom na. Nakadawat na sa iyang gidangatan.

"Di puwedeng katunga? Naa naman sab god koy pamilya? ni Jerome. Mapaubsanon ang tunada.

Nilingi si Teddylyn ngadtong Atty. Becalas. Niduol ang abogado ngadtos iyang kliyente. Nihunghong.

"Dawata na lang na. Kay seguradong makomiter na siya ana. Himoan dayon nag Compromise Agreement. Unya makadawat dayon kas danyos ug sugod karong bulana sa suporta sa bata. Kay kun magmagahi pa ka, malangan ang kaso. Segurado man gyud tang modaug. Apan puwede man langanon sa mga apelasyon. Gikan sa RTC ngadto sa Court of Appeals. Unya gikas Court of Appeals ngadto sa Supreme Court. Abtan pa tag siyamsiyam. Unya di nato matag-an sa paglabay sa panahon, dunay masakit, dunay mamatay o dunay mabangkaruta. Mao na ang risgo sa di makig-areglo sa gamay'ng kantidad," ni Atty. Becalas. Niyango ang kliyente.

"Sigi. Dawaton nako. Aron mahuman ta," ni Teddylyn. Nipasiklap ni Jerome.

"OK. Good. Sige paglamano mo" sa Mediator. Naglamano si Teddylyn ug Jerome. Gikugos ni Jerome si Efren. Nihilak ang bata. Kay wa pa kaila sa amahan. Nitalikod ang Mediator dala ang pagliso sa iyang swiver chair. Niatubang siya sa computer aron pandayon ang Kasabutan sa Areglo o Compromise Agreement. Nag-apir ang duha ka abogado. (Alang sa libre nga konsulta, guntinga ning sugilanon ug dad-a sa opisina sa tagsulat)