Walay kamatayon ang gugma

Gula 26

Wala man usab ing angay dalian si Megan. Wala man kini mag-apas nga dili maulahi sa trabaho sanglit anaa ra man kini mag-alagad sa pharmacy nga gipanag-iya sa ilang amahan. Ma-late man o dili sa trabaho, dili kana problema. Dili mabalaka si Megan nga matangtang sa trabaho sanglit ang ilang Daddy man maoy tag-iya sa botika nga gialagaran niini. Lahi niya si Jody nga mo-time in gayod sa tukmang oras nga isulod niya sa trabaho.

Mahilomon nga namahaw sila si Jody ug Mr. Garcia karong buntaga. Lahi sa nangaging mga buntag nga magpunay sila’g sultihanay samtang nangaon. Si Jody dili gani motan-aw ngadto sa iyang amahan. Wala siya makasabot kun nganong naingon siya niini karon.

“Kumosta ang imong trabaho, Hija?” Mibuak si Mr. Garcia sa kahilom taliwala sa ilang pagpangaon.

“M-maayo man, Dad,” laktod niyang tubag.

“Good,” nagkanayon ang amahan.“Mora’g inspired ka na karon, dili ba?”

Wala motingog si Jody. Miduko siya sa dihang gitutokan siya sa iyang amahan. Nakasabot siya sa unod sa sinultihan niini.

“Boyfriend mo na ba si Randy?” Nangutana si Mr. Garcia. - Sumpayan pa