Walay kamatayon ang gugma

Gula 25

Apan karon ingon sa usa ka multo si Megan nga nagahulga sa relasyon nila ni Jody ug Randy. Wala kalikayi ni Jody nga mobati og kabalaka. Nasayod siya sa taras ni Megan kun bahin na sa lalaki. Maayo kining mopakitang motibo ngadto sa lalaki nga magustohan niini. Magpaduding, matud pa, aron madani ang lalaki. Ug mao kini ang lintunganay sa kabalaka ni Jody. Miprangka si Megan kaniya nga nakagusto kini sa iyang hinigugma. Nasayod siya nga dili magpanuko si Megan sa pag-ilog ni Randy gikan kaniya kun makakita kini’g higayon.

Apan gialam-alaman lang usab dayon niya ang iyang kaugalingon. Misalig siya sa kamatinud-anon sa gugma ni Randy kaniya. Milaom siya nga dili gayod magpatental si Randy sa iyang manghod.

Kaadlawon na sa dihang nahikatulog si Jody.

Pagkabuntag, sama sa naandan, sila lang si Jody ug Mr. Luis Garcia ang nagdungan sa pagpamahaw. Tagdugay nga momata si Megan inigkabuntag maong sila lang si Jody ug Mr. Garcia ang kanunay magdungan sa pagpangaon. -- Sumpayan pa