Anino sa adlaw

Gula 7

Samtang nagmaneho sa motorsiklo, gikuha ni Ricky ang derringer nga gisuksok sa iyang hawakan. Gamiton kini niya kun magkinaunsa man. Sukad lang nakadawat siya’g hulga sa iyang kinabuhi, kanunay na niyang gidala ang maong pistola. Duna siya’y permit to carry niini. Nagtinir siya sa maong armas kay dili siya makatugot nga mamatay nga dili makasukol sa mga tawong nagtinguhag daotan kaniya.

Wala na mahibulong si Ricky nga may mga tawong magtinguhag daotan sa iyang kinabuhi. May kalabotan kini sa iyang trabaho isip mediaman. Sukad sa nobatos pa siya sa media, daan na siyang isog kaayong mangomentaryo sa bisan unsang kahiwian sa mga tawong nangatungdanan. Ligdong ug dili bias ang iyang mga komentaryo pero duna lang gihapoy masuko kaniya kay ibutyag man gyud niya ang kamatuoran.

Tungod sa iyang kaligdong nga sakop sa media, nakadaog siya isip konsehal sa dihang nagpapili siya sa tuig 2004 aron makaserbisyo sa katawhan sa ilang lungsod. Apan sa iyang pag-alagad isip konsehal, iyang nasuta nga lisod na gayod nga usbon ang sistema sa politika. Nabisto usab niya ang daghang mga anomaliya sa ilang mayor nga iya pang gikalingawan og komentaryo hangtod karon. Wala na siya magpasubli og papili pagka-konsehal sa piliay sa 2007. Gitingob niya ang iyang panahon sa media. -- Sumpayan pa