Ang chick boy

CEBU, Philippines - Nag-andam na si Philipp aron mopaingon sa iyang naandang assignment pagka-radio reporter aron manghagdaw og balita apan takulahaw lang mitingog ang message alert sa iyang cellphone.

Ang news direktor diay ni Philipp maoy nag-text kaniya ug nasuko nganong duha na ka higayon nga wala siya makatuman sa katungdanan pag-report atol sa ilang morning newscast.

Unsaon nga pwerte mang luyaha ni Philipp sa ilang kumbati ni Linette didto sa Q2 motel nga ilang gisudlan. Nakapanglingo-lingo si Philipp ug mapanagan-on kaayo siya nga nakigkita sa iyang news director.

Giisyohan siya og memorandum sa iyang news director ug ipatubag kini sulod sa 24 oras aron timbang-timbangon ang iyang rason kay kun wala siya’y bug-at nga hinungdan sa pag-absent, suspenso g’yud siya.

Wala g’yud mahimutang si Philipp. Tugaw kaayo ang iyang kaisipan nga nakadawat siya og memo sa iyang news director.

Nahipugwat siya sa iyang paghinuktok dihang kalit lang mitingog ang call alert sa iyang cellphone. Si Gemini ang mitawag kaniya.

“Philipp gusto ko nga makigkita nimo unyang gabii. Adto ta magkita sa Sanciangko’s Wildflower mga alas utso,” matud ni Gemini sa iyang text. “Sige kay lonely ko karon,” abtik nga reply sa reporter.

Pagkagabii, didto na si Philipp sa Sanciangko’s Wildflower apan wala pa miabot si Gemini. Nakurat kaayo si Philipp kay dunay tawo nga didto maglingkod sa ngitngit nga bahin nga miitsa kaniya og kinumot nga papel.

Gikulbaan si Philipp kay nagtuo siya nga paregla na kadto, apan mitindog ang nagngisi nga tawo. Ang kauban diay niya nga radio reporter nga si Ely.

“Uy, tigsudlanan ka sab diay dinhi?,” giingnan ni Philipp si Ely nga may gikatibol na didto sa iyang lamesa. “Kay ngano ikaw ra’y makamao?” abtik nga tubag ni Ely ug nagkinataw-anay silang duha.

Kay wala pa man moabot si Gemini, didto usa milingkod si Philipp sa lamesa ni Ely. Wala siya makatingog pagkakita nga ang gikatibol ni Ely mao diay si Linette.

Taud-taud, miabot si Gemini. Gikamay dayon ni Philipp ang babaye ug didto sila molingkod uban sa lamesa ni Ely.

May gihunghong si Ely kang Philipp. “Ok ra ba nimo, i-deyt nato ang atong mga partner sa usa lang ka room?”

Nakalitan si Philipp sa sugyot sa kauban niyang reporter. “Ambot mosugot ba kaha ang duha ka chicks, pero ako walay problema,” gitubag ni Philipp si Ely. (Sumpayan pa)