Walay kamatayon ang gugma

Gula 21

“Kun magminyo na unya ta. Aron dili ta niya lisod-lisoron.”

“Buing...”

Ug gikusnit ni Jody ang kilid ni Randy.

Nagpadayon ang ilang panagsulti. Bisan unsa na lang ang mga butang nga nahimong tema nga ilang gihisgotan.

Paglabay sa mga takna, nanamilit na si Randy. Mao pa makaalinggat si Jody nga pasado na diay sa alas onse sa gabii.

“Pag-amping,” pahimatngon ni Jody. “Hinay-hinay lang sa imong pagmaneho.”

“Salamat,” ni Randy pa.

Ug gihatod ni Jody ngadto sa nahimutangan sa sakyanan niini. Sa wala pa mosakay si Randy sa awto, mipatik una kini’g halok sa iyang aping.

Dihang nakabiya na si Randy, mibalik si Jody sa sulod sa balay. Iyang natukmaan si Megan nga naglingkod sa sopa sa sala. Daw nagpaabot kini kaniya.

“Puyde bang magsulti ta, Sis?” Gikan ni Megan.

“Nganong dili?” ni Jody pa.

Milingkod si Jody sa atbang ni Megan. Gitutokan siya niini. Gilainan siya sa tinan-awan ni Megan kaniya.

Milingiw si Jody sa tinan-awan ni Megan. Daw dili siya makaharong sa tinutokan niini nga ingon sa nagabasa sa unod sa iyang hunahuna. -- Sumpayan pa