Pusil nga pinunitan

Ngitngit pa ang palibot paggawas ni Jover Campus sa iyang balay. Nabatasan niya nga banagbanag iyang itungas sa iyang kamaisan sa baryo Putomayo ning dakbayan. Anhi sab siya motubag sa sugo sa kinaiyahan. Maong tambok iyang kamaisan.

Di sab siya mogamit sa iyang pansayan sayong buntag kay anha mangaligo iyang duha ka anak dalaga nga sila si Marivel ug Teddylyn. Di siya kabanos. Dihang mopungko na unta siya tupad sa taas nga punoan sa mais, may nasindulan siya. Gahi ug bug-at nga butang. Niduko siya ug nakita niya ang sinaw nga puthaw sumbohan sa usa ka rebolber. Gikulbaan siya’g kadiyot. Unya iyang gipunit ang pusil. Giablihan ang tambor. Puno sa unom ka sinaw nga bala nga may tatak 38 SPL. Iya lang unang gibutang sa yuta ang pusil samtang nipadayon siya’g tubag sa sugo sa kinaiyahan. "Naa gyud diay armadong mag-agian sa maisan magabii," tuaw niya sa hilom.

Diyanitor si Jover sa opisina sa Tasador ning dakbayan. Nagsayidlayin siyag pananum ining tunga sa ektaryang luna nga kabilin sa nitaliwan niyang mga ginikanan. Bugtong man siyang anak. Busa wa siyay kompetensiya sa pagpahimulos sa maong kabilin. Naminyo siyas iyang kaklase sa hayskul nga si Rita. Duha ra ilang anak. Nagtungha na sa kolehiyo. Ang kurso ni Marivel BS Psychology. Kang Teddylyn HRM. Naningkamot si Rita nga makaabag-abag sa gastohan sa pangmatrikula nila. Namaligya siyag sari-sari sa ilang balay. Nanawat og tahionon kay sastre man siya. Unya naglotog pagkaon.

Gitakin ni Jover ang rebolber. Gisuksuk niya sa walang kilid sa baksanan sa iyang purol nga maong. Gitabunan niya sa iyang T-shirt. Kay nisilang na ang adlaw paglugsong niya. Iyang ihatod ang maong armas sa balay sa barangay kapitan nga si Kapitan Efren Larrobis. Sa iyang gigikanan, saylo sa ilang balay ang balay sa kapitan.

Lagsik iyang lakang nga niagi sa kilid sa ilang balay. Unya naabtan niya si Alex Tuoga, ulitawo nga katalirungan sa iyang kamaguwangan. Nanglili sa gingi sa amakang bongbong sa ilang banyo. Nisurok dayon ang dugo ni Jover. Notoryos ni si Alex sa ilang baryo nga kusog mamoso. "Hoy! Alex! Wa pa gyud ka mabuta buanga ka!" singgit ni Jover. "Ha?! Wa ko manglili oy! Nangita lang kog kaka. Kay nagpapangitag kaka akong manghod" ni Alex. Di katotok sa silingan. "Kanang kakang balhiboon!" ni Jover nga niduol sa banyo aron pahibaw-on iyang anak nga may nanglili. Pero sa ilang tingog, seguradong nakamatngon na.

Apan ... "Ugh! Ayay!" ni Jover nga nadakdak. Maayong pagkaigo iyang tiyan sa flying kick ni Alex. Black belter si Alex sa karate. 18 pay edad. Samtang si Jover 45 na ang edad. Usban pa unta siya’g patid ni Alex dihang gibunot ni Jover ang pusil. "Sige patiri kog usab kay babha gyud imong dughan ini ron!" ni Jover nga nipunting sa pusil ngadto sa dughan ni Alex. Napatiurok si Alex. Nakalugar og tindog og balik si Jover. "Ah duwaan man na!" ni Alex nga nihana og agaw sa armas. "Unsay duwaan!" ni Jover nga nipunting sa armas sa panganod ug nipabuto. "Bang!" "Sunod buto imo kun magbabag ka pas akong agianan" ni Jover.

"Ilabay nang armas! Manumanu lang ta!" ni Alex nga hambugero’g tuno. "Tiguwang na ko. Wa koy pangamot. Ikaw batan-on. Unya black belter pa. Kuyaw lag mabun-og o mamatay kos imong patid" ni Jover nga nilikay sa agi. Nibabag gyud si Alex ug nihana og ilog sa armas. Napugos si Jover og pabuto sa armas. Bang! Unya nalup-og si Alex. May dugong nisidlit sa lungag sa iyang tiyan. "Rita! Pagtawag mog ambulansiya!" singgit ni Jover dayong dagan og kusog ngadtos balay sa kapitan.

Dead on arrival sa ospital si Alex. Nakiha si Jover og homicide. Iyang abogado nga si Atty. Romeo Brusas nipaintra ni Jover sa plea bargaining. Niangkon si Jover sa salaod. Unya naminus iyang sentensiya kay duna man siyay paminus nga gitawag og voluntary surrender. Wa siya mapriso kay naaprobahan iyang probation. Unang kaso man to niya, sukad man masukad. Ug wa siya pasakaig kaso nga illegal possession of firearms kay nitoo man ang kapitan nga pinunitan niya ang maong armas. Wala siyay tuyo sa paghupot. Kanang giingong intent to posses.

(Alang sa libre nga konsulta, guntinga ning sugilanon ug dad-a sa opisina sa tagsulat)