Gula 3
“Oo,” ni Ronald pa. “Ug dili na mausab ang akong hukom.”
“Unsaon na man lang ang imong kaugmaon?”
“Daan nang ngitngit ang atong kaugmaon, Manoy, tungod kay kining nasora gidominahan sa mga hakog ug mapahimuslanon sa gahom. Ang atong mga lider wala magpakabana sa batakang panginahanglan sa kinabag-an. Pulos lang sila pagarpar. Nagpadayon pagsaka ang gidaghanon sa mga walay trabaho. Daghan ang nag-ilaid sa kagutom samtang atong mga lider padayong nagpaburot sa ilang mga bolsa aron pagtagbaw sa way kinutoban nilang kahangol. Asa man ta makakaplag og mahayag nga kaugmaon niana?”
“Pero dili solusyon sa kalisod ang pagsaka sa bukid, Ronald.”
“Usa kini ka paagi sa pagpadayag sa among dissent sa kasamtangang gobyerno.”
“Nasayod na ba sila si Tatay ug Nanay ning imong desisyon.”
“Wa pa. Kun mahimo ikaw na lay pasabot nila.”
“Si Teresa?”
“Ako nay maantigong mopasabot niya.”
Nanghupaw si Ricky. Namatikdan ni Ronald nga mibati kini’g kasubo sa nakab-ot niyang desisyon. Pinangga siya sa iyang maguwang. -- Sumpayan pa