Labaw pa sa gipangayo

Congratulations anak, matud ni Don Anselmo kang Ryan. "Ikaw diay ang summa cum laude. Malipay gyud unta si mama mo kun nabuhi pa lang siya." "Basin malimot ka sa gisaad nimong sakyanan, pa." Ayaw kabalaka kay dili ko kana hikalimtan ug labaw pa niana ang akong ihatag kanimo.

Human sa graduation, may gidalit nga makabusdik nga hikay ug didto sa halapad nga laguerta, diin naglingkod si Don Anselmo.

"Tua sa ibabaw sa lamesa sa salas ang akong gasa alang kanimo Ryan." "Salamat Papa," dayong saka sa ulitawo sa ilang mansiyon. Didto sa ibabaw sa lamesa, wala siya’y lain nga nakita kun dili usa ka libro. Iya kining giduol, "Oy! Unsa ba kining gigasa ni Papa, usa ka libro lang, Biblia."

Sa iyang kalagot, milayas si Ryan nianang gabhiona ug wala na gyud siya mobalik.

Milabay ang mga tuig, may pamilya na si Ryan ug ulitawo na ang iyang usa ka anak. Unya usa ka higayon niana, "Carlo, ayaw palabi og kuyog sa imong barkada kay makadaot kana sa imong pagtuon."

"Ikaw ang mabasul niini, Dad, kay tua ka kanunay sa imong bisyo."

"Ayaw pag-ingon niana kay akong gihimo ang tanan alang sa inyong kaugmaon."

Milabay ang pila ka bulan, "Oy, si Papa man ning ania sa mantalaan. Akong basahon.

"Ryan, anak, kundili na kita magkita, sa gihapon ania sa balay ang imong gipangayo."

Namatay diay ang iyang amahan sa kaguol. Midali siya pagpauli ug iya pang hiabtan ang haya sa iyang amahan.

"Papa, pasayloa ako sa akong nabuhat," midangoyngoy siya ibabaw sa lungon sa iyang amahan.

Human mapahigayon ang lubong niini, gisuhid niya ang tibuok balay ug didto sa lamesa, sa mao gihapon nga lugar, ang Biblia nga wala gayud matandog sukad sa iyang paglayas. Iya kining gipakli, ug didto sa tunga niini ang yawe sa usa ka Mercedes. Sa paglabay sa pila ka adlaw, gihatag sa abogado ang mga papeles nga nagpamatuod nga siya ang manununod sa katigayonan sa iyang amahan.

Misamot ang pagpatuyang niya sa iyang bisyo hangtod nga naaksidente siya. Naputol ang iyang mga kamot ug ingon man ang usa niya ka tiil. Sa dakong pagbasul, nakatuaw siya.

"Husto ka, Papa, labaw pa diay sa akong gipangayo kadtong nahisulat sa libro nga motudlo unta kanako, sa kinabuhi nga dili ako mahimong alaut." (Kataposan)