Ug wala sila maglangan. Nanggawas dayon sila sa garahe, mipaingon sa gate aron makabiya na sa panimalay ni Atty. Gumera. Apan kalit lang silang napahunong dihang nabanwagan siya sa siga sa flashlight gikan sa tawo nga nagbarog duol sa gate. Si Atty. Gumera!
“B-Bongkoy,” mikurog si Rosalinda sa kahadlok samtang hugot nga migunit sa bukton ni Bongkoy.
“Ayaw kahadlok,” ni Bongkoy pa. Andam ako pagpanalipod kanimo.”
Miduol si Atty. Gumera sa ilang nahimutangan. Gikulbaan na pag-ayo si Rosalinda. Apan maisogon nga miharong si Bongkoy sa ilang agalon.
“Congratulations, Hijo,” ni Atty. Gumera pa nga mipikpik sa abaga ni Bongkoy.
“Daghang salamat, Papa,” ni Bongkoy pa usab ngadto sa abogado.
“U-unsay buot ipasabot niini?” Nakapangutana si Rosalinda nga naglibog sa iyang nasaksihan.
“Hija,” si Atty. Gumera ang mipasabot kaniya. “Ang tinuod, akong anak kini si Bongkoy. John Henry ang matuod niyang ngalan.”
“U-unsa?” Tuaw ni Rosalinda nga daw dili makatuo. -- Sumpayan pa