Kaso sa pang-isnats

Bida! Kabadlungon sab gyung bataa! Niresulta na gyud nang iyang pagsige’g kuyog-kuyog sa mga barkada! Asa man ta mangitag abogado ini ron?" ni Yolly nga nagpamente ning sayong kabuntagon.

Nagpanglingo siya samtang nagtrapo sa taksi nga nagparking atubangan sa ilang balay sa Poblacion, Sibonga. Samtang nagdigamo sa ilang pamahaw iyang kapikas nga si Linda, nidali og gawas kay nakadawat og teks nga ilang kamaguwangan nga si Steve gidakop sa pulis kay kuno nang-snatch og kwentas. Gipahibawo dayon ni Linda si Yolly.

Nahinumduman ni Yolly nga sa niaging gabii, paghuman la’g panihapon, nilakaw si Steve. Nikuyog sa iyang duha ka ig-agaw nga sila si Ritche ug Roy. Pasagdahan na man lang nila ilang anak ulitawo. Kay kun badlongon, magubot na. Kay mosukol na man sa amahan. Nasayod man si Steve gikan sa mga uyoan niya nga iyang amahan puwerte sang bugoya panahon sa pagkaulitawo. Konsumisyon kaayo iyang lolo nga si anhing Anton Puebelo nga usa ka abogado. Gigastohan unta si Yolly pagpakuhag abogasya. Apan kutob ra sa unang tuig. Wa gyud nihuman kay maglabing bisyo sa inom, drugas, sugal, barkada ug pamabaye. Dihang naminyo kay nakapamabdos, nagdrayeb na lang og taksi aron makabuhig pamilya.

Patagmon

"Mangutana lang unya kun ni Warly nga naa sa Kapitolyo ug ni Ricky ba kaha nga naa sa munisipyo, kun may kaila ba silang abogado," ni Linda.

"Suwayig pangutana atong mga ig-agaw. Pero maayo sab nang bataa nga patagmon! Aron maleksyon sa iyang kabisyoso!" ni Yolly nga nagtrapo sa hood sa taksi.

"Moingon ka lang ana! Kadtong hitabo nimo sa una nga napriso sab ka, gipasagdan ka bang Tatay Anton?" ni Linda. Wa nitingog si Yolly. Nakita niya iyang kaugalingon sa iyang kamaguwangang anak karon. Unya, nalabwan siya sa iyang anak.

Niteks si Linda ngadtong Warly ug Ricky. Duna sila’y mga nakailang abogado, apan dili matayotayo. Mga mahal kaayog acceptance fee.

"Wa man sila’y marekomendar nga abogado," ni Linda nga nigawas na sab sa ilang balay. Gibiyaan kadiyot ang gibuhat sa kusina. Nikunot ang agtang ni Yolly. Niping-it.

"Si Rudy na lang kahay akong adtoon," ni Linda. Nangyamiid si Yolly.

Nadatu Na

"Ayaw anang Rudy oy! Sukad siya naabogado unya nadatu na, nakalimot na mang tatay ug nato. Nagarboso na man," ni Yolly.

Si Atty. Rudy Gabucan, kanhi working student nga legal researcher sa tatay ni Yolly. Naabogado sa iyang kaugalingong paningkamot.

"Basig nalimot ka nga pagkaabogado ni Rudy siya dayon ang nilaban ni tatay kay nakiha’g falsification of document tungod kay nakanotaryo siya’g patay na ang nagpirma. Unya sa wa pa ni-retire si tatay sa panglaban, si Rudy ang niabang og opisina alang niya balig lima ka tuig," ni Linda.

"Mao lagi. Pero daghan ko’g dili maayong istorya batok niya!" ni Yolly. "Well, ang mangga kun way bunga, wa may mobato. Mao ra sab na ang tawo. Daghang mosaway o mangitag sayop sa tawong naningkamot sa kaayohan," ni Linda.

"Ikaw bahala!" ni Yolly

Namakasyon

Sunod adlaw nibisita dayon si Linda sa bupete ni Rudy.

"Ingna si Yolly nga wa siya’y kauwawan nako. Nganong mauwaw man siya? Nga wa man siya’y sala nako. Ingna siya nga kanunay kong nahinumdom sa among pinagsamahan," ni Rudy.

Nagpahiyom nga naglingkod sa lingkuranan tungod sa iyang lamesa. Sa bag-o pang nagawas si Yolly sa rehab, gipakuyog ni tatay niya ngadtong Rudy. Namakasyon sila’g duha ka semana sa Valencia, bukiran sa Alegria. Enjoy sila didto sa mga paryente ni Rudy og balbinbalhin og puyo sa iyang mga paryente. Didto sila nakakaon og hawo, bitin, baki, piyo ug mga kinhason sa tab-ang nga tubig. Tagbaw sila’s tubang bahal ug bag-og dawat. Lingaw sila’g pangharana magabii.

Nakagawas

Dangtag duha ka adlaw, nakagawas si Steve sa prisohan. Sa mga testigos nga nakuhaan og affidavit ni Rudy, naprobahan nga mistaken identity lang ang nahitabo. Naaan lang si Steve. Kay amgid-amgid niya ang snatcher. Nadakpan ang tinood isnatser ug nakuha sa iyang bulsa ang daghang cash ug resibo sa prinda sa ahensiya. Giprinda sa isnatser ang kuwentas human na-isnats. Nabalik ang panagsuod ni Rudy ug Yolly. Naminaw lang siya sa mga intriga sa mga paryente ni Yolly nga gustong mopahimulos ni Rudy. Ug si Rudy wa magpatonto. (Guntinga ning sugilanon ug dad-a sa tagsulat aron libre imong pangunsulta)