Walay kamatayon ang gugma

Gula 13

Ang kangitngit sa sulod sa sinehan gipahimuslan ni Randy. Gigunitan niini ang iyang kamot ug gihagkan ang iyang aping. Dihang wala siya motutol, ang iyang ngabil na usab maoy gihagkan ni Randy.

“Happy anniversary, Sweetheart,” hagawhaw ang tingog ni Randy.

“Happy anniversary, too,” tubag ni Jody.

Subli nga gihagkan ni Randy ang iyang ngabil. Niining higayona, mas tidlom na ang paghalok ni Randy kaniya. Sa sinugdan, gipamatyag niya ang kalalim sa paghalok sa hinigugma kaniya. Apan sa kadugayan, gitukmod niya ang nawong sa lalaki.

“Randy, please...” hagawhaw ang tingog ni Jody.

“Why...?” Hagawhaw usab ang pagpangutana ni Randy.

“This is not the proper place.”

“S-sorry...”

“It’s okey...”

Gitibawas nila ang pagpanan-aw og sine.

Alas siyete sa gabii na sa ilang pagpanggawas sa sinehan.

“Wala ka ba gutoma?” Nangutana si Randy.

“Wala man,” laktod nga tubag ni Jody. “Dili ba nanihapon na man kita?”

“Tinuod kana. Pero mora’g sayo pa man kadtong panihapona.” -- Sumpayan pa