Alimanok sa sapa

Kada panglaba ni Nanay Totang sa sapa mokuyog gyod ko. Malingaw man god kong magsud-ong sa matahom nga talan-awon sa palibot sama sa nagkiaykiay’ng kawayanan nga nag-ambo sa daw nag-awit nga tubig. Pagkahayahay sa hangin nga giginhawa sa kabuntagon!

"Uy, Dong, ayaw pamuyag diha, ha?" Pahimangno ni Nanay nga misugod nag hikyad sa iyang labhanan. "Hilan baya ning lugara."

Wa ko mopatuo ni Nanay.Nagsige kog dayeg sa mga nindot nga kinabuhi nga akong nakita ilawom sa tubig sa sapa: ang mga uwang ug gurami nga nakig-ubay-ubay ug sa matag karon ug unya moliksi sa tin-aw nga sulog. Pagkamalipayon nila.

Naibog ko sa ilang kahimtang. Naligo ko sa sapa tipon kanila. Dihang nasigpatan kong Nanay, iya kong gibadlong: "Uy, uy, Dong. Ngano god tawong naligo ka diha? Hala, hala ... haw-as diha!" may kahadlok ang tuno sa tingog ni Nanay. Apan wa ko kini panumbalinga. Hangtod nga akong himatikdan nga may mipilit sa akong lapalapa. Mikawas ko paingon ni Nanay.

"Da, giingnan bitaw tika nga dili maligo didto, gahi gyod kag ulo." Mahay sa akong inahan nga mitangtang sa alimatok nga grabeha gyong nakasupsop sa akong lapalapa.

Sukad niadto, mopatuo na gyod ko sa mga badlong ni Nanay. Kay ang mga pulong sa inahan iyaha ug alang ra gyod diay sa kaayohan sa anak. Salamat sa sapa nga mihatag nako’g leksyon. (Katapusan)