Lovers in Pari-an

Gula 107

“Wa nay laing paagi, Ros, aron makalikay kita kang Atty. Gumera. Mamiya kita ning iyang panima’y.”

“Di kaha ta mameligro kun ato kanang buhaton. Tingali’g iya tang ipadakop. May utang ra ba ko niya.”

“Bahala na. Moadto kita sa dapit nga walay nakaila kanato. Sa dapit nga dili na kita niya matultolan.”

Naglisod paghukom si Rosalinda. Nagkadaiyang mga pangagpas misantop sa iyang hunahuna. Daghan siya’g mga reserbasyon nga nakapaturok kaniya’g kabalaka. Nahadlok siya sa kasuko unya ni Atty. Gumera sa higayon nga mosanong siya sa sugyot ni Bongkoy nga mamiya sila gikan sa panimalay niini.

“Kini lang ang bugtong paagi nga maluwas ang atong gugma, Ros,” nagkanayon si Bongkoy. “Busa kun gipakabili mo pa ang atong relasyon, kun wala ka mahaylo sa bahandi ni Atty. Gumera, mosanong ka sa gusto kong mahitabo.”

Wala motingog si Rosalinda.

“Manglakaw kita unyang tungang gabii,” gikan na usab ni Bongkoy. “Paaboton ko ikaw didto sa garahe hangtod sa alas dose sa gabii. Kun dili ka mahiabot sulod sa maong takna, nagpasabot kana nga wala nay bili alang kanimo ang atong gugma.” -- Sumpayan pa