Pulos wa katag-an

Malipayon ang tulo ka mag-agaw nga nanguli sa ilang probinsiya sa Bohol. Sila si Mie-Bok, Ti-ak ug Vers-Qui pulos nagtungha sa dakong unibersidad sa Sugbo. Nurse ang ilang gikuha nga kurso. Ug karon, naa na sila sa katapusang ang-ang sa ilang pagtungha. Ug kay semester break man lagi, maong nagkasabot ang tulo nga manguli una sa ilang yutang natawhan.

Pag-abot sa tulo, maoy nasugat sa ilang panan-aw ang ilang apohang lalaki nga si Lolo Eming, nga nagkiang-kiang ang nilaktan didto sa may nataran.

Dinhi nanggawas ang mga hambog sa tulo ka manag-agaw.

"Agay... mga agaw," si Lolo Eming, nagkiang-kiang man ang nilaktan." Unsa man ... kahibalo mo'g unsay hinungdan?" sukna ni Vers-Qui nga mahambugon ug may gustong ipasabot. ug sa makadyot nanghunong ang tulo sa ilang paglakaw. May gusto silang pamatud-an.

"Aw...! anhi, matistingan ang atong abilidad sa kurso nga atong gikuha mga agaw" dason ni Ti-ak.

"Unsa may buot mong ipasabot gaw?" ni Mie-bok ngadto sa agaw niya Ti-ak.

"Pulos man gud nurse ang atong gikuha bi ... dinhi kontis ta ninyong tulo kun kinsay makatag-an kun unsay hinungdan kun nganong nag kiang-kiang na si Lolo nato?" Segunda ni Ti-ak.

"O sige gaw'' ni Vers-Qui ug Mie-Bok nga nagkadungan.

Nagka-uyon ang tulo nga tag-anon kun unsay hinungdan kun nganong nag kiang-kiang ang linaktan sa ilang apohan.

"Akong tagna kun nganong nagkiang-kiang na si Lolo, kay, gidanlak na", ni Ti-ak nga unang nipadayag sa iyang panagna.

"Ay ... sayop ka gaw. Dili gyud na maoy hinungdan. Tan-awa ang pamayhon kun nganong nagtakiang si Lolo. Tan-awa nagkihodkihod. Akong tagna ana ... kay gibun-i ang itlog ni Lolo" kang Mie-Bok nga maoy iyang pagtuo basi sa iyang nakita.

"Ah...pulos gyud mo mga sayop mga agaw, ga-patuyang lang mo. Ang hinungdan sa pagkiang-kiang ni Lolo, kay gi-almoranas na" ni Vers-Qui nga masaligon sa iyang panagna.

Ug wa naglangan ang tulo ka mga hanggaw nga manag-agaw. Ila dayong giduol ang ilang apohan aron mahibaw-an kon kinsay nakatag-an nilang tulo sa hinungdan sa pag kiang-kiang sa ilang apohan.

"Lo, akong tag-anon kun unsay hinungdan sa imong pag kiang-kiang Lo! Gi-danlak ka Lo?" ni Ti-ak nga way lipodlipod nga nitagna ngadto sa apohan.

Apan igo lang nilingolingo sa ulo ang iyang apohan timaan nga sayop kini sa iyang panagna.

"Ako Lo ... akong tag-an Lo, kay, gi-bun-i imong itlog?" ni Mie-bok.

"Di gihapon na mao ang hinungdan Dong Mie-bok," kalmadong tubag sa apohan.

"Ako Lo ... ako Lo..., ang hinungdan niana kay ... gi-almoranas ka?" ni Vers-Qui nga maoy katapusang nitagna.

"He....he...he .... samot nga di gihapon na mao apo ko," sa ilang apohan nga nibahikhik og katawa.

"Unsa man diay hinungdan sa imong pag kiang-kiang Lo?" sa tulo nga nagkadungan og pangutana sa ilang apohan.

"Ay dahhh ... parehas tang tanan oy mga apo ko ... asta sad ko wa ko katagna, kay abi man gud nako og utot ra tong mogawas sa akong lubot .... sos ... askang dimalasa ... tubol man diay. Busa padaplin mo kay motiwas ko'g kalibang," sa apohan nga nagkatawang nipalayo.

Daling nanalimbong ang tulo ka mag-agaw sa ilang mga kamot, dili kay nauwaw sila nga wa katag-an, kun dili, sa ka baho sa tubol sa ilang apohan nga karon pa nila nahimatngoni nga nangalisbo. (Kataposan)