Walay kamatayon ang gugma

Gula 9

Sa paghigawas niya sa main lobby, diha-diha nalantawan niya ang awto ni Randy nga kolor beige nga naghunong sa atbang. Milingi-lingi siya. Unya midali siya paglabang sa dalan dihang dili na kaayo daghan ang mga sakyanan nga nangagi. Midali siya pagduol sa nahimutangan sa sakyanan ni Randy.

Naabli ang pultahan sa tuong kilid sa awto.

“Kaganina ka ra ba?” Gipangutana niya si Randy dayong sakay sa awto.

“Dili pa lang dugay,” mubong tubag ni Randy nga naglingkod atubangan sa manibela.

“Sorry nga nalangan ko,” ni Jody nga mipahimutang paglingkod sa front seat. “Nakigsulti pa man gud nako ang among editor bahin sa balita nga akong gisulat.”

“Okey lang,” matud ni Randy. “Sayo pa man sab.”

“Asa man ta karon?” Sukit ni Jody.

“Sa Ayala,” tubag sa ulitawo. “Mangita ta didto’g kan-anan nga dili kaayo daghan og kustomer aron walay disturbo.”

“Okey,” ni Jody pa. “Ikaw ang mag-igo.”

Gipadagan na ni Randy ang sakyanan nga gipangunayan niini pagmaneho. Dangtan og napulo’g lima ka gutlo, nahiabot na sila sa parking lot sa Ayala. Human ikapahimutang ang sakyanan, nanganaog sila ug misulod sa Ayala. Sa usa ka luho nga kan-anan misulod sila ug nangaon. -- Sumpayan pa