Lovers in Pari-an

 Gula 103

Apan asa man kaha sila paingon? Nakasukna siya sa iyang kaugalingon. Sabado karon ug walay trabaho sa opisina. Dili ginhapon nga molakaw si Atty. Gumera sa adlaw’ng Sabado. Sagad anha lang kini sa balay.

Mihunong si Rosalinda sa iyang gibuhat aron magsusi. Giadto niya si Tasing sa kosina. Iya kining gipangutana kun asa paingon ang ilang agalon nga sayo man kining milakaw.

“Naa man si Atorni sa sulod sa iyang lawak?” Taho ni Tasing.

“K-kinsa man diay tong sakay sa awto nga bag-o lang mibiya?” Sukit ni Rosalinda.

“Si Bongkoy. Gisugo siya ni Atorni.”

“Asa man kuno to siya?”

“Sa Santander. May gisugo si Atorni kaniya alang sa mga saop niini. Dako man og kayutaan kanang atong agawon didto sa Santander.”

“Mao ba, Nang? Unya, kanus-a man kaha mahibalik dinhi si Bongkoy.”

“Aw, malagmit...unya pa tong hapon mahiuli.”

Naputol ang ilang panagsulti sa dihang gitawag si Rosalinda ni Atty. Gumera. Gisenyasan siya niini nga pasak-on sa taas, sa ikaduhang andana sa balay. -- Sumpayan pa