Walay kamatayon ang gugma

 Gula 8

Mao pa gayo’y paggawas ni Jody gikan sa buhatan ni Mr. Isagani Beltran aron pag-submit sa gisulat niyang news story sa dihang mitingog ang incoming call alert sa iyang cellphone. Gidali niya kini’g kuha gikan sa shoulder bag aron pagsusi kun kinsay nanawag. Si Randy diay. Iya dayon kining gitubag.

“Ready ka na ba?” nagkanayon si Randy didto sa pikas tumoy sa linya.

“Aw,” nahakanga siya’g kadiyot. “O-oo...”

“Dia na ko sa gawas sa inyong office,” ni Randy pa.

“Sige,” niya pa. “Moanha na ko diha.”

Human sa ilang panagsulti sa cellphone, giuli niya ang kahimanan ngadto sa iyang shoulder bag. Midali siya pag-adto sa banyo aron pagpanghindik sa iyang kaugalingon. Namulbos siya’g diyotay sa iyang nawong. Gibutangan usab niya’g nipis nga lipstick ang iyang mga ngabil. Gisudlay niya’g maayo ang tag-as niyang buhok.

Migawas dayon siya sa banyo human makapangareglar sa iyang kaugalingon. Mipadayugdog siya paingon ngadto sa gawas sa ilang buhatan. Wala na niya tugawa ang kauban niyang mga reporter nga busy pa sa pagsulat sa nahagilap nilang mga balita sulod sa news room. Midiretso na siya’g gawas. -- Sumpayan pa