Walay kamatayon ang gugma

Gula 7

Sa kanunay iyang gipaninguha nga ikapakita ang kamatinud-anon sa iyang pagpangalagad ngadto sa publikasyon nga iyang gitrabahoan ug sa samang higayon, mahimong usa ka masinugtanong anak ngadto sa iyang amahan. Apan may mga higayon gayod nga ang pagtrabaho niya sa buhatan nga karibal sa publikasyon sa iyang amahan maoy mahimong pabilo sa panaglantugi nila ug sa iyang Daddy. Mosamot na kun sulsolan ni Megan, iyang manghod nga usa ka pharmacist, ang ilang amahan. Dili na lang siya motubay. Molugak na lang siya sa panaglalis tungod kay ingogan siyang maghunahuna nga motukol ug makiglalis sa ilang amahan.

Gawas sa pag-isip niya’g utang kabubut-on kang Mr. Beltran isip maoy nag-build-up niya’g maayo sa journalism, wala gayod usab siya’y gusto nga manarbaho sa kompaniya nga gipanag-iya ra usab sa iyang amahan. Alang kaniya, walay challenge ang maong trabaho. Mas gusto siyang manarbaho sa pribadong kompaniya nga gipanag-iya sa dili niya kadugo tungod kay iyang gituohan nga dinhi masukod gayod ang iyang abilidad. Dinhi komportable siya sa pagtrabaho. Dinhi mabatyagan niya ang kagawasan isip usa ka indibidwal. -- Sumpayan pa