Sa kataposan Nisya, makadimdim na gayod ako sa katam-is sa saro sa himaya, sa imong pagka-babaye!" nagkanguhal ang sinultihan ni Miyoy samtang inanay niyang gihushos ang sapot sa iyang asawa.
"Mao ba akong mahal nga Miyoy?" dihay tuno sa kaparaygon sa ganay nga tingog ni Nisya.
Kini man god ang unang gabii sa magtiayong Miyoy-Nisya, human sila kasla ning ilang dakong simbahan sa lungsod sa San Fernando.
Gani, sa dayon nang pagkahuman sa ilang kasal, diha may gihunghong si Padre Virgilio Abay, nga nagkanayon:
"Ayaw gayod kamong duha pagpatuyang sa inyong gibati, karong gabii ... human sa inyong kasal, kay pulos na ra ba kamo mga edad-edaran!"
Insakto baya kadtong gipahimangno kanila ni Padre Virgilio Abay, nga maoy nagpahigayon sa misa alang sa ilang kasal, kay sa panuigon god karon ni Nisya, nga may kalim-an na og siyam, delikado nga ma-overdos sa kalami!
Maayo man si Miyoy, bisan maguwang pa ni Nisya og panuigon, kabisado naman sa pagbinuakay og pakwan. Pruyba niini makatulo na god mabiyudo, gumikan sa kataas og lahutay.
Wa lang tuyoa ... may nanggisod sa panumdoman ni Nisya, kun ngano ba gayod nga sa diha pa siya sa kadingding sa iyang kabatan-on, wa gyod siya makahunahuna og minyo? Sa iyang hunahuna, bahala na lang, basta matagbaw gayod ang iyang bana sa inantigo niyang pagromansa.
"Simbako Nisya, kun dag-on ka sa lahutay nianang imong bana, ayaw intawon kalimot og sangpit kanako og pakitabang!" dihay inahanong tambag kaniya sa iyang inahan nga taudtaod na usab nabiyuda.
"Oo ... Nay Benita ... tumanon ko kanang imong gitambag kanako!" daling tubag ni Nisya.
Takulaw ... mibanos ang linugapak sa sawog nilang kawayan, sulod sa bag-ong magtiayon sa may sibay. Way hunong ang inuyog nga labaw pa nga may linog. Mitahirig ang haligi. Ambot unsang hitaboa, nga wa man untay bagyo?
"Tabanggggg Nayyyyy Benitaaaaa ... kayyyy gikuyapannn siiii Miyoyyyyy!" nagminatay si Nisya.
Didto pa masuta sa kaulahian nga ang kinatibuk-an nilang mga silingan ning ilang balangay sa Pitalo, nga nahubog diay si Miyoy sa baho, gikan sa bilahan ni Nisya, nga sulod sa upat ka buwan wa maligo. (Kataposan)