Lovers in Pari-an

Gula 100

Wala motingog ang abogado. May gikuha kini sa hunos sa lamesa nga nahimutang dapit sa ulohan sa mahunol-hunol nga kama nga higdaanan niini. Miduol kini kaniya nga nagbitbit na og gamay’ng kahon.

“Imo na kini,” sa abogado pa nga mipakita sa kahon ngadto kaniya.

“U-unsa man kana?” ukit ni Rosalinda.

“Singsing,” matud ni Atty. Gumera dungan ang pag-abli sa gamay’ng kahon ug gikuha ang alahas. “Mahalon kining singsinga. Gituyo ko kini pagpalit alang kanimo.”

Wala motingog si Rosalinda. Nakasabot dayon siya kun nganong gipalit ni Atty. Gumera ang maong singsing alang kaniya. Buot gayod siyang hayloon niini aron dawaton niya ang tanyag niini nga magpakasal sila.

“Ambi ang imong kamot,” awhag ni Atty. Gumera, “kay atong isul-ob kining maong singsing sa imong tudlo.”

“D-dili lang ko modawat nianang maong singsing, Atorni,” maikogon nga mibalibad si Rosalinda.

“Nganong dili ka man modawat niini? Wa ka ba makagusto niining maong singsing? Nindot kining singsinga, Hija. White gold kini.” -- Sumpayan pa