Walay kamatayon ang gugma

IGula 4

Mitingog ang message alert tone sa cellphone ni Jody Garcia samtang siya nagdukdok sa keypad sa computer alang sa balita nga iyang sulaton nga ipatik sa pamantalaang Silver Star Daily nga iyang gialagaran. Mihunong siya sa iyang gibuhat. Gikab-ot ang shoulder bag nga gipatong sa lamesa tupad sa gipahimutangan sa computer nga iyang giatubangan. Gikuha niya ang cellphone nga gisulod sa shoulder bag.

Gisusi niya ang text message sa cellphone. Gikan kang Randy ang mensahe. Iyang gibasa ang mensahe ni Randy.

“Gud pm. Kuhaon tka unya dha n u ofis,” nagkanayon ang text ni Randy.

Nakasabot dayon si Jody sa text message sa iyang hinigugma. Nagsabot man gud sila nga adto manihapon sa gawas unya. Unang anibersaryo karon sa ilang relasyon. Tangkod nang usa ka tuig sukad silang nagkahigugmaay. Gusto ni Randy nga magsaulog sila sa unang usa ka tuig sa ilang pagminahalay pinaagi sa pagpangaon sa usa ka luho nga kan-anan.

Gitubag ni Jody ang text ni Randy.

“Ok,” niya pa sa text. “Mga 6:30 lang. Sulat pa ko news.”

Wala madugay mitubag si Randy sa iyang text. Misanong kini sa oras nga iyang gitakda. -- Sumpayan pa