Walay kamatayon ang gugma

 Gula 2

Paandaron na unta niya ang computer nga nahimutang sa iyang cubicle dihang miduol kaniya si Queennie, kauban niyang reporter sab sa Silver Star.

“May gitugon ra ba si Mr. Beltran, Day,” nagkanayon si Queennie.

“Unsa man, Day?” Sukit ni Jody.

“Pasudlon ka kuno sa iyang office kun mahiabot ka na.”

“Ngano man kuno?”

“Ambot lang. Adtoa lang aron imong masayran. Mahinungdanon tingali ang iyang tuyo nimo.”

Miadto gilayon si Jody sa buhatan ni Mr. Isagani Beltran. Sa iyang pagsulod miyanghag si Mr. Beltran ngadto kaniya. Ug mipahiyom kini. Dayon misinyas kini kaniya sa paglingkod.

“Good work, Ms. Garcia,” nagkanayon si Mr. Beltran nga mikawhat sa bag-ong isyu sa Silver Star Daily. Ug mitamod sa balita sa front page niini.

“Ngano man diay, Sir?” Nakapangutana si Jody.

“Nakaiskop ka. Matud pa ni Ric Dicdican ang circulation supervisor nikusog ang halin sa atong newspaper karon tungod ning imong banner news story karon bahin sa kapakyas sa Ombudsman pag-imbestigar sa mga kurakot sa gobiyerno.”

“Maayo hinuon kun mao kana, Sir.”

“Aduna koy nahipos nga material. Gusto kong ikaw maoy mosuwat niini.”

Ug gitunol ni Mr. Beltran ngadto kang Jody ang usa ka brown envelop nga may sulod nga mga mahinungdanon nga mga dukomento nga magamit sa pagsulat og balita. (Sumpayan pa)