Walay kamatayon ang gugma

Nagkadungan og pamahaw si Jody ug Megan niining buntaga. Wala sila’y tingganay samtang nangaon. Ang ilang amahan natulog pa niining tungora.

“Kumosta na man mo ni Randy?” Si Megan ang unang mitingog sa kadugayan.

“Okey ra man.” Laktod nga tubag ni Jody.

“Huh!” Ingon sa wala mahimuot si Megan sa gitubag ni Jody.

Wala na magtingog si Jody. Nasayod siya kun nganong ingon niadto ang reaksyon ni Megan sa iyang gisulti.

“Belib ko nimo, Jody,” nagkanayon si Megan.

“Ngano man?” Tubag-pangutana ni Jody.

“Tungod kay naangkon mo ang tanan mong gusto. Maayo ang dagan sa imong lovelife ug career. Sikat ka na kaayo nga reporter. Pero...”

“Pero unsa, Megan?”

“Angay kang mag-amping.”

“Nganong nakasulti ka man og ingon niana?”

“Tungod kay patyunon ang taga media. Daghan ang gustong mopatay ninyo kay hilabtanon mo sa kalihokan sa ubang tawo. Nahinumdom ka sa massacre sa Maguindanao? Di ba kapin man sa 30 ka sakop sa media ang nakalas niadto?” -- Sumpayan pa