Gula 96
“Ayaw kabalaka, Nang. Panalipdan ka namo kun iapil ka ni Atorni sa iyang kasuko namo ni Bongkoy sa higayon nga masakpan niya ang kinawat-kawat namong panagkita.”
“Kapait baya niining inyong kahimtang, uy.”
“Sagdi lang, Nang. Masulbad ra lagi ning problemaha.”
Laing gabii. Mingaw na ang palibot. Nakaseguro si Rosalinda nga nakatulog na si Atty. Gumera. Mihinok siya’g gawas sa katulganan nila ni Tasing ug miadto sa garahe. Bisan hinay ang iyang pagpanuktok sa pultahan sa katulganan niini sa garahe apan kadali rang nakaabli ang ulitawo. Ingon sa gihulat gayod niini ang iyang pag-abot.
Gitak-opan dayon ni Bongkoy ang pultahan human makasulod si Rosalinda.
“Duna koy surpresa nimo,” nagkanayon si Bongkoy.
“Unsa kana?” Usisa ni Rosalinda.
Wala motubag si Bongkoy. May gikuha kini sa cabinet. Duha ka cellphone. Ang usa niini gitunol sa ulitawo ngadto kaniya.
“Gipalit ni nako ganina,” ni Bongkoy pa. “Baratuhon ra hinuon kini pero mas maayo na lang basta may magamit. Kun gusto tang magkita, magkontakay lang ta sa cellphone.” -- Sumpayan pa