Ang video sa modus

Sir! Sir! Ikaw tag-iya ining sakyanan imong gidrayeban, Sir? matud sa batan-ong lalaki nga di mominus sa diseotso ang edad. Igo lang naka-parking si Ritche Tibon, magtutudlo sa Maritrans Academy tungod sa merkado sa Talamban. Niurong siya dinhi kay magpalit og saging ug paborito niyang mantalaan -- Banat News.

Pagnaug niya sa itom nga Isuzu Sportivo, giduol dayon siya sa batan-on ug gipangutana.

“Dili, Dong. Ang tag-iya ini akong ugangan nga si Dr. Edward Cuenca. Ngano man unta?” ni Ritche.

“Pero ang imong ugangan maoy tig-drayeb ini kasagaran?” sa batan-on nga medyo may gikahadlokan.

“Siya gyud. Karon makadrayeb lang ko ini kay gisugo ko niya’g papalit og saging sa merkado. Unya mohapit na lang sab ko’g palit og mantalaan rong buntaga” ni Ritche.

“Sir, dawata lang ning kuwarta. Kinyentos pesos ni. Iuli ko lang ni’s imong ugangan!” sa batan-on. Nagtunol og papel de banko.

“Unsa man diay transaksiyon ninyo sa akong ugangan?” ni Ritche nga gibati’g kahibulong ug nagsugod og kalibog.

“Taas na kaayong istorya sir,” sa batan-on.

“Pasabta ko” ni Ritche. Ug nagbarog sila duol sa walang kilid sa sakyanan dihang gisugid sa batan-on ang tanan.

Nagpaila ang batan-on nga siya si Roy Zapanta. Giilad niya ang ugangan ni Ritche. Iyang konsabo si Wilben Duhig. Mangabang sila’g habalhabal nga tig-parking sa parkingan sa Royal Charm Pharmacy duol sa merkado. Bisag estudyante sila sa kolehiyo mga anak og adunahan. Apan kulang ilang allowance. Nag-sideline sila’g pangilad kay aron makamintin sa ilang bisyo sa drugas. Wa mabisto ilang bisyo, sa ilang mga ginikanan.

Ang ilang modus magtumba sila’g motorsiklo luyo sa mo-parking nga sakyanan sa customer nga mamalit og tambal sa Royal Charm Pharmacy. Inig atras sa sakyanan, ila dayong pekpekon nga paurongon kay dunay naatrasan.

Mga tulo na ka adlaw ang nakalabay, nabiktima nila si Dr. Cuenca, ang ugangan ni Ritche. Sa kakuyaw sa doctor, nihatag dayon og kinyentos pesos. Labi na nga nakita niya nga may lumping ang plaka sa motorsiklo ug niagas ang gasolina sa tangke.

Pagdawat ni Roy sa kinyentos, gibahin dayon nila ni Wilben. Gibayran nila’g usa ka gatos ang tag-iya sa motorsiklo. Ug tag-dos sentos sila. Abi nila’g tinood nga nailad ang doctor. Wa diay. Kay pagkasunod adlaw, nagdala siya’s video nga gi-record gikan sa camera sa luyo sa Sportivo. Gipakita niya ni Marivel nga tindera’g budbod sa parkingan. Nagpahiyom ang doctor nga nagpakita sa video ngadto ni Marivel. Nakakita gyud si Marivel sa video nga nakuha didto ang pagyayong ni Roy ug Wilben sa motorsiklo nga tumba na daan ngadto sa luyo sa Sportivo. Nakita sab didto ang pagdawat ni Roy sa bayad sa doctor. Matud ni Marivel nga nagngisi kuno ang doctor nga namulong. “Tan-awa nato kung kinsay nailad ini!” Iya kunong isumiter ang video sa ABS-CBN TV Patrol aron mapahimatngonan ang mga tawo sa modus sa parkingan.

“Di pa mo ana? Nga makita mo sa TV. Bida mo morag sa Wowowee!” gikomedyahan ni Ritche si Roy.

“Ayaw tawon, sir. Tabangi ko sir. Inig kabisto namo sa among mga ginikanan, di na mi paeskuylahon. Wa na mi allowance. Kulatado pa unya mi!” hangyo ni Roy.

“Unya unsa may gusto nimong buhaton nako?” ni Ritche.

“Dawata ning tibook kinyentos. Ihatag sa imong ugangan. Ug ingna siyang di niya ipasalida sa TV patrol ang video” ni Roy.

“Swerte ka kay dia nako ang sobre nga ipahatag niya kang Leo Lastimosa karong hapon. Bantog rang gahi ang sulod ini” ni Ritche.

“Ambi kuno sir, bi” ni Roy.

“Ah di puwede. Kinahanglang moatubang gyud mo’s akong ugangan. Siya gyud ang mohukom ini” ni Ritche.

“Paliton nako na, sir. Dia koy singko mil pesos. Bag-o lang kong nakadawat og allowance para rong semanaha” ni Roy nga naghinamhinam.

“Ang maayo ini, inig human nako’g pamalit dinhi, bisitahon ninyo si Papa Edward. Tabangan ta mo’g hangyo niya nga pasayloon mo” ni Ritche. Gihataga’g address si Roy.

Nanggawas sa gate sa balay ni Dr. Edward Cuenca si Roy ug Wilben nga morag naibta’g tunok. Dili na ipasalida sa TV patrol ang video. Human sila nipirma sa ilang saad nga biyaan ang mga bisyo ug nga wa nay mabiktima sa parkingan sa tumbatumba sa motorsiklo. Kinahanglan ilang badlongon ang nangopya’s ilang modus. Kay kun may mabiktima pa, ang video ipasalida dayon. Nakuhakuhaan ang badlongon didtong dapita. (Katapusan)