Gula 91
Aron ba kaha nga dili na gayod makahigayon sila si Rosalinda ug Bongkoy sa pagsultihanay, gipabalhin ni Atty. Gumera sila si Rosalinda ug Tasing ngadto sa guest room. Wala na sila pahigdaa sa agalon sa servant’s quarter. Si Bongkoy na lang ang nagpabiling adto magkatulganan sa garahe.
Kinawat-kawat na ang ilang panagkita. Gilisdan sila sa maong kahimtang. Apan wala sila’y laing mahimo. Dili sila makahimo pagtutol sa kabubut-on sa ilang agalon.
Kasagaran sa gabii magkita sila si Rosalinda ug Bongkoy. Iatol nila sa higayon nga natulog na si Atty. Gumera. Mohinok si Rosalinda paggawas sa guest room ug moadto sa nahimutangan ni Bongkoy sa garahe.
“Wa ka ba mahadlok nga masakpan ni Atorni niining atong gibuhat?” Gipangutana ni Bongkoy si Rosalinda usa ka gabii niana sa ilang panagkita didto sa iyang katulganan sa garahe.
“Wa ko mahadlok,” ni Rosalinda pa. Dili mahimong hikawan kita niya sa atong kagawasan.”
Natandog si Bongkoy sa gisulti ni Rosalinda. Gigakos siya sa ulitawo. Migakos usab siya sa iyang hinigugma. Gibati nila ang kamingaw sa usa’g-usa bisan wala sila magkalagyo sanglit anaa ra man sila sa usa ka poder.” -- Sumpayan pa