Mutya sa saging gardaba

Tungang gabii, maoy namat-an sa magtiayong Miyoy Nisya ang tulo ka buok anak, nga nagdaghong sa tumang kagutom. "Unsaon naman lang niini Nisya, nga dili man gayod nako masungasong sa pagpamasol, kay hilabihan man kakusog sa sulog sa dagat?" sagol kanguhal ang sinultihan ni Miyoy ngadto sa iyang asawa.

"Misamot man hinuon kakusog sa hangin gikan sa bagyong Frank, nga milampornas dinhi sa atong dapit?"

Pait kaayo palandungon ang kahimtang sa magtiayong Miyoy Nisya, dinhi ning ilang dapit sa may balangay sa Pitalo, kay kun dili makaadto si Miyoy, sa dagat kanunay gayod nga mabasiyo ang sudlanan sa ilang bugas.

"Karon Miyoy ... milurang na man sa paghinay ang maong bagyo, hain may mas maayo molusad ka na lang sa pag-adto sa dagat, kay basin adunay modawi nga mga isdang til-ogon nga sarang atong ikasud-an ug ikabaligya aron ilito ta og binlod nga bugas nga akong tughongon!" luhaan ang duha ka mata ni Nisya nga namulong sa iyang bana.

Igo pa lang gani nga naniak ang alimbaonong banagbanag, giandam na ni Miyoy, ang mga kahimanan niya sa panagat. Malaumon siya nga unta ubay-ubay gayod  ang modawi karon sa iyang pagpamasol.

Ambot unsang hitaboa, nga nahitiurok man si Miyoy, niadtong usa ka punoan nga saging gardaba, nga miali sa iyang paglakaw?

Imbis mopaingon na unta siya sa dagat, iya naman hinuon kini nga gituba, aron dad-on sa iyang pinuy-anan ug malung-ag ni Nisya, nga sarang ikapamahaw sa iyang tulo ka buok anak nga pulos nagkutoy ang tiyan sa kagutom?

"Mibalik man lagi ka Yoy ug nagbitbit na man nianang saging nga garbada? Basin makit-an sa tag-iya sa yuta nga imong gibitbit?" mapanagan-on nga namulong si Nisya.

"Bahala na lang Nisya ... kun kinsay tag-iya niining yuta nga gitamnan og saging?" nagkanguhal ang tinubagan ni Miyoy.

"Wa man kini tuyoa og tuba ... natumba man kining maong saging, gumikan sa makusog nga bagyong Frank!"

Nakainiktin ang duha ka tiil ni Miyoy, sa dihang dunay iyang nasigpatan sa may bulig sa saging garbada nga mikalit paggilaw sa tumang kasuwaw.

Didto pa himatud-i sa magtiayong Miyoy Nisya, nga naputos diay ang saging gardaba, sa mga mutya nga bulawan? Lakip si Nisya nakasayaw sa tumang kahinangop sa iyang nakita ug nagpasalamat silang magtiayon nga kadto gasa sa Kahitas-an nga sa ilang kalisod maluoy gihapon kanila ang Makagagahom, aron sila mabuhi uban sa ilang tulo ka buok anak nga pulos gutom. (Kataposan)