Alang kang Rosalinda, usa na ka matang sa pagpangapiki ang gihimo ni Atty. Gumera nila ni Bongkoy. Dili na kini makiangayon. Apan may kaisog ba siya nga mosudya sa iyang agalon kinsa dako na kaayo’g natabang kaniya ug ingon man sa iyang mga ginikanan ug igsuon? Makahimo kaha siya pagsudya sa tawo nga nautangan niya og kabubut-on?
Sa unang higayon, gibati ni Rosalinda ang kahisagmuyo sa gihimo ni Atty. Gumera wala na siya makauyon sa gibuhat niini ngadto kanila. Unsa may katungod sa ilang agalon nga mohikaw sa kagawasan nila ni Bongkoy nga mahigugma sa usa’g-usa?
Sukad niadto, nag-amping na sila si Rosalinda ug Bongkoy sa ilang mga lihok aron dili sila masakpan ni Atty. Gumera. Lisod alang kanila ang paglikay sa usa’g-usa sanglit anaa ra man sila magpuyo sa usa ka balay. Dili usab mahimong dili na lang gayod sila magsultihanay tungod kay mingawon sila sa usa’g-usa bisan sa usa ka adlaw lang nga dili sila magkasulti.
Gipaningkamotan lang gayod nila nga dili sila makita sa ilang agalon nga magsultihanay. Naglikay sila sa kasuko niini. - Sumpayan pa