Idlas ang katumanan sa gugma

 Gula 85

“Wow, I see,” ni Rev pa nga mipahiyom.

Unya nakita ni Lonia nga napahit sa ulitawo ang ubos nga ngabil niini.

Namatikdan ni Lonia nga miligdong ang nawong ni Rev. Ingon sa may bitterness nga iyang nasihag sa hun-ag sa panagway niini.

“Dugay na ba ang inyong relasyon?” Mitutok si Rev kaniya.

“Taudtaod na,” tubag ni Lonia. “Mag-two months na kaming mag-on.”

Nakapanaguto si Rev. Unya nanglingolingo kini.

“Hinay diay ko’g radar kay karon man lang ko masayod niini. Lakip si Mike wala mosulti nako mahitungod sa inyong relasyon.”

“Tingalig wala kamo makahigayon paghisgot mahitungod sa inyong tagsatagsa ka lovelife?”

“Tinuod kana. Kay sa matag higayon nga magkasulti kami si Mike, ang kanunay namong hisgotan mao man ang bahin sa writing. Sama gud sa higayon nga magkasulti ta, bahin ra sab sa panulat ang pirme natong hisgotan.”

Wala motubay si Lonia sa gisulti ni Rev.

“Malipayon ka ba sa relasyon ninyo ni Mike?” Sukit ni Rev.

“Nganong nangutana ka man og ingon niana?” Misumbalik sa pagpangutana si Lonia ngadto sa ulitawo.

Mipakibo sa abaga si Rev. “Just asking.”

“Malipayon ko sa among relasyon,” pag-angkon ni Lonia. “Mike is a perfect gentleman. Responsable siya ug buotan.”

“Ug versatile writer pa gyud,” dugang ni Rev. “In fact, kamong duha si Mike ang sinaligang magsusulat sa UCV Romances karon.” -- Sumpayan pa