Idlas ang katumanan sa gugma

Gula 84

Igo lang mipahiyom si Lonia sa komplimento ni Rev.

“May lain pa kong ibalita nimo,” ni Rev.

“Unsa kana?” Sukit sa dalaga.

“Misamot na kalapad ang atong sirkulasyon karon. Aduna na kitay distributor didto sa laing nasud alang sa mga Pinoy nga nanimuyo didto. Sa Hong Kong, maoy atong distributor ang Victory Jewellery Co. Sa US, mao usay atong distributor ang Philbooks nga nag-distribute usab sa mga nobelang pocketbook ngaTinagalog.”

“Maayo hinuon aron makabasa sab sa akong mga sinulat ang mga Pinoy nga atua na magbase sa abroad.”

Mipatunga kanila ang kahilom.

“Tuod diay,” namulong si Rev aron pagwakli sa kahilom, “nakita ko kamo si Mike nga nanuroy niadtong miaging adlaw sa Ayala. Nangaon kamo sa usa ka outlet sa Jollibee sulod sa maong mall. Wala na lang ko moduol ninyo kay akong nakita nga ingon sa intimate kaayo ang inyong panag-uban.”

Wala motingog si Lonia. Wala siya magdahom nga nakakita diay si Rev kanila ni Mike nga nag-uban sa pagpangaon. Apan hilom niya kining gikalipay. Buot niyang pasuyaon si Rev.

“I’ve noticed something different sa inyong closeness,” matud ni Rev. “Mahimo bang masayod ko sa real score tali ninyo? It’s something personal, anyway. Okey lang kun dili ko nimo tubagon.”

“It’s okey,” ni Lonia pa. “Tubagon ko ang imong pangutana. Mag-on na kami si Mike karon.” -- Sumpayan pa