Si Berto pungkol

Ayaw nalang pag-usik-usik sa imong panahon Berto kay wa ka gyu’y maani, miprangka si Lovely sa ulitawong guwang. Sa paglakaw ni Berto nagbagulbol si Lovely ug naabtan sa iyang   inahan gikan nangumpra sa merkado. Naunsa ka Lovely nga sayo kaman gisapot? Da naglagot ko ni Berto magsigi og balikbalik, kadaghan ko na siya prangkahi wa ko’y gusto niya apan mobalik lang gihapon.

Halos tanang babaye dinhi sa atong baryo iyang gipangulitawhan apan wa gyu’y nisugot. Kinsa man sang buanga ang mosugot niya nga kabati og nawong, tiguwang pa gyud ug naa pay ilong naglisngag lang mora gyud og palwa sa lubi.

Puno sa pagtamay si Berto tungod kay siya usa lang ka manananggot apan siya nagpailob lamang. Usa siya ka tawong kugihan ug matinabangon ngadto sa iyang isigkatawo.

Usa ka buntag niana samtang nanilhig si Lovely sa ilang tugkaran may sakyanan nga mihunong sa iyang tungod kay ang drayber nangutana.

"Miss, asa man ang balay ni Berto Pungkol," ug iyang gitudlo ang payag nga atbang sa ilang balay.

"Kinsa man diay ka Dong?" "Ako ang abogado sa iyang igsoon nga atua magpuyo sa Canada. Iya kining latest model nga Pajero gihatag sa iyang igsoon sa wa pa mamatay ug duna pa gyu’y kwarta sa bangko, Bank of Canada nga nagkantidad og $50 milyones."

Ug ang tawo nisakay sa Pajero padung sa payag ni Berto. Pagkahapon nabaniog sa tibuok Tawason nga usa diay ka milyonaryo si Berto. Pagkaugma sakay si Berto sa iyang bag-o nga Pajero kuyog sa iyang abogado padung sa siyudad aron pagkuha sa mga dokumento nga hinatag sa iyang igsoon nga namatay.

Napulo ka adlaw nawala si Berto ug pagbalik niya kuyog ang usa ka matahom nga babaye nga giisip niyang katabang. Misugat kaniya halos tanang tawo sa tibuok Tawason. Nagpatukod siya og dako kaayong mansiyon ug pagkahuman iyang gipa-blessingan ug nagkumbira siya agi'g pasalamat sa Kahitas-an.

Si Lovely hapit dili nalang mobuwag sa kiliran ni Berto, ug nakig-away man gani sa katabang ni Berto. Adlaw nga tanan ang mga dalaga sa ilang baryo nag-ambahan aron lang makig-estorya kang Berto ug usa niana mao si Lovely ang babaye nga mabiay-biayon.

Apan si Berto wa na gyud patintal kanila kay sa una ila man siyang gitamay ug giayran. Pagkasunod buwan gipahibawo dayon ni Berto ang tanang tawo diha sa Tawason mahitungod sa ilang kasal sa iyang katabang lakip na si Lovely iyang espesyal nga gidapit.

Pagkasayod ni Lovely nga kaslunon na diay si Berto hilabihan niyang nakahilak ug nagmahay nganong wa niya sugta si Berto nga karon usa diay ka adunahan ug milyonaryo.

Ug karon nakahangad siya sa langit ug nag-ingon nga "Dili diay angay hukman ang atong isigkatawo kay magmahay ta sa ulahi". (Kataposan)