“Magpakasal na lang ta,” matud ni Bongkoy. “Gusto kong makaseguro nga kita na gyud ang magkadayon.”
“Kay kita na man bitaw karon.”
“Pero dili pa hingpit, Ros. Lahi gyud kun kinasal na kita kay wala na gyu’y makahimo pag-ilog nimo gikan kanako.”
“Nahadlok kang mailogan ni Atty. Gumera?” Dalang komedya ang pangutana ni Rosalinda.
“Gusto lang kong maneguro, Ros,” pasabot ni Bongkoy. “Kun kinasal na unta kita, dili na siya makapanghilabot kanato.”
“Nagtuo ka ba diay nga ibaylo ko ikaw sa usa ka biyudo?”
“Adunahan siya, Ros. Nahadlok ko nga basin sa kadugayan matental ka sa tinagingting sa iyang salapi. Tingali sa pagkakaron dili ka pa mahaylo niya. Pero nabalaka ko nga basin mausab ang imong hunahuna sa kapulihay.”
Wala motingog si Rosalinda. Gipamalandongan niya ang gisulti ni Bongkoy.
“Unsa man, Ros?” Misukna si Bongkoy pagkilab sa pipila ka gutling. “Mosugot ka ba sa akong hangyo -- nga magminyo na ta?”
Nanghupaw si Rosalinda. Unya naitlib niya ang iyang wait. Naglisod siya paghukom sa gihangyo ni Bongkoy kaniya. -- Sumpayan pa