Lovers in Pari-an

  Gula 82

“Gihunahuna baya na nako, Nang. Pero di gyud ko makahimo sa pagdawat sa iyang gitanyag. Mas importante para nako ang pagsunod sa pinitik sa akong kasingkasing.”

“Unya, nasayod na si Atorni sa imong desisyon?”

“Oo. Pero iya kong gihatagan og dugang panahon sa pagtimbangtimbang sa iyang gitanyag kanako. Namasin tingali siya nga mausab pa ang akong hukom.”

Milabay ang usa ka semana. Nakabalita si Rosalinda nga ang ilang dapit gihugpaan sa epidemya. Daghan ang nataptan sa sakit nga suka-kalibang. Kasagaran sa nataptan mao ang mga bata. May pipila na ka kinabuhi nga nakalas. Ug ang duha sa iyang mga manghod nahalandig sa tambalanan sa siyudad sa Sugbu gumikan sa maong sakit.

Ang iyang mga ginikanan midangop kaniya. Kay kinsa bay lain nilang kadangpan gawas kaniya? Kuwarta ang ilang gikinahanglan. Lain na usab nga suliran nga sagubangon ni Rosalinda.

Walay laing nahunahunaan si Rosalinda nga makatabang kaniya gawas lang kang Atty. Gumera. Naikog na unta kaayo siyang mangayo og pabor sa iyang agalon ilabi na nga wala pa gani niya kasugdig bayad ang iyang nautang dihang naaksidente ang iyang amahan. Dili na gayod unta gusto si Rosalinda nga mangayo og lain pang pabor gikan sa iyang agalon. -- Sumpayan pa