Lovers in Pari-an

Gula 80

“Mao kana, Ros,” ni Bongkoy pa. Mopauli man gud kuno ang iyang anak nga atua sa Amerika.”

“Diay ba?”

“Oo. Mobakasyon kuno’g duha ka semana dinhi. Gimingaw tingali sa Pilipinas. Dugay na man gud kunong wa makabakasyon tong iyang anak dinhi sa ato.”

“Nagkasulti na diay mo si Atorni?” Mipalain si Rosalinda.

“Oo.” Maoy tubag. “Kaganina kay iya man kong gisugo. Nga-ngano man diay?”

“Wa ba siya masuko nato?”

“Wa man. Nganong masuko man siya?”

“Nalimot ka sa nahitabo kagabii?” Nga nakamata siya sa atong pagkanta-kanta didto sa garahe?”

“Wa man sab ko niya sukmati.”

Dihang sila na lang duha sa balay, nakahigayon sa pagkulukabildo sila si Rosalinda ug Tasing. Iya kining gitug-anan bahin sa gisugilon ni Bongkoy kaniya.

“Mopauli ra ba kuno ang anak ni Atorni, Nang,” ni Rosalinda pa.

“Kinsay nagsulti nimo niana?” Sukit sa hamtong babaye.

“Si Bongkoy. Gisugo man kuno siya ni Atorni nga ipaayo ang suga sa lawak sa anak niini. Mobakasyon lagi kuno ang anak sa atong agawon.” -- Sumpayan pa