Idlas ang katumanan sa gugma

Gula 76

“Wala siya’y labot sa akong kinabuhi,” matud ni Mike. “Wala kami relasyon. Busa wala siya’y katungod sa pagpanghilabot kanato.”

Wala motingog si Lonia. Gihinuktokan niya ang gisulti ni Mike.

“Higugmaa ko, Lonia,” ni Mike pa. “Hatagi ko’g higayon nga ikapamatuod nimo ang katim-os sa akong katuyoan.”

Wala gihapon motubag si Lonia. Mitidlom ang iyang hunahuna sa lawom nga pamalandong. Iyang natimbang-timbang nga dili lisod higugmaon si Mike. Ambongan kini, utokan ug responsable.

Nakahunahuna si Lonia nga sugton na lang niya si Mike. Kun tinuod nga ang gugma makat-onan ra inig labay sa panahon, basin diay kun makakat-on na siya sa paghigugma ni Mike kun may relasyon na sila.

Misantop usab sa iyang hunahuna nga basin og pinaagi sa iyang pagpakigrelasyon kang Mike, malaksi na gikan sa iyang kasingkasing si Rev. Basin diay kun si Mike ang mamahimong instrumento aron mabuntog niya ang nagsalimuang niyang pagbati alang kang Rev.

“Sige, Mike,” daling hukom ni Lonia. “Gidawat ko na ang imong gugma.”

“W-wa ka ba magtiaw, Lon?” Sukit ni Mike nga ingon sa dili makatuo.

“Di ko makamaong magkomedya kun bahin na sa gugma,” matud ni Lonia. “Hinaot nga imong ampingan ang atong relasyon.”

“Ipasalig ko kanimo, Lon, ampingan ug amomahon ko ang atong relasyon aron mo-prosper kini. Ug salamat nga wa ko nimo pakyasa.” -- Sumpayan pa