Ang gahom sa pag-ampo ug pagtuo

Kining maong mga hitabo nga akong isay-say pulos tinuod ug di minamao-mao lang. Gani, ako na kining gikonsulta sa usa ka eksperto sa pagtuon kabahin sa gahom sa hunahuna sa tawo ug gitubag ko niya sa iyang lindog sa pamantalaan sa kaulohan.

May kahigayonan sab nga adunay mga magbabasa sa Banat News nga naka-eksperiyensya ning di kasagarang mahitabo sa kinabuhi sa tawo. Ug tingali alang kanila sulagma lang nga nahitabo.

Pipila na ka tuig ang milabay, samtang sakay ako sa usa ka bus paingon sa dakbayan sa Toledo gibati ko ang sugo sa lawas-ang pag-itsar sa tubig. Nagsubay ang bus sa Manipis nga niadtong panahona wa pa mapalapdi ang agianan. Gipugngan ko lang kay maagwanta pa man kini. Gahuwat lang kong dunay mopahunong sa sakyanan nga pareho sa akong gibati kay mauwaw kong mohangyo sa drayber sa paghunong makadiyot.

Milabay ang mga gutlo apan wa gyu’y mipahunong sa sakyanan ug maayo na gyud kaayong ipabuhagay sa tubig. Gidaug ko sa kauwaw ug mao na lay akong nahimo ang pag-ampo ug pagsige’g hunahuna nga aduna untay madaut nga gamay'ng bahin sa makina aron mohunong kini. Giklaro ko jud nga gamay lang bahin sa makina kay nagsubay baya ang bus sa Manipis.

Tuod man, wa madugay kalit gipahunong sa drayber ang bus ug mipahibawo namo nga aduna lang siya’y tan-awon sa atubangang bahin sa makina makadiyot. Nanganaug ang mga pasahero kay daghan sab diay ang gustong mo-jingle nga nagpugong lang.Nagpasalamat lang sab kong gamay ra ang depekto sa sakyanan.

Ang ika-duha nakong kasinatian mao nga sakay ako sa usa ka jeepney gikang namista sa Talamban kuyog ang akong asawa. Paingon na kaming mopauli sa dihang gibati ko ang sugo sa lawas nga pag-jingle. Akong gikomedyahan og sugo ang akong Misis nga hangyoon ang drayber nga pahunongon makadiyot kay mo-jingle ko. Apan wa siya mosugot kay mauwaw siya. Maayo lang ta kuno kung bus pa ang among gisakyan kay di kaayo uwaw ihangyo.

Wa na koy laing nahimo gawas sa pagpangaliya nga madaut lang unta ang makina sa PUJ aron mohunong kini. Taudtaud ko gyud nga sige’g hunahuna nga madaut ang makina niini. Samtang nagdagan ang jeepney kalit lang natangtang ang usa ka bahin sa makina sa ilawom nga bahin niini. Napugos ang drayber sa pagpahunong ug dali kong nangitag lugar nga makapagawas sa tubig sa akong lawas.

Aduna pa untay laing mga hitabo nga di kasagaran akong nasinati apan limitado ang espasyo ning atong pamantalaan. (Katapusan)