Idlas ang katumanan sa gugma

Gula 75

“I know,” ni Mike pa. “Pero wala ko makagusto niya. Ikaw ang gipitik sa akong kasingkasing, Lonia. Hinigala lang ang pagtagad ko kang Bernadith.”

Napahit ni Lonia ang iyang wait. Misantop sa iyang hunahuna nga managsama diay sila’g kahimtang si Bernadith. Managsama silang wala hatagi’g espesyal nga pagtagad sa lalaki nga ilang gihigugma.

Si Lonia nakagusto sa hilom kang Rev apan casual kaayo ang pagtagad niini kaniya. Giisip lang siya niini nga usa ka ordinaryong higala. Si Bernadith usab dayag nga nakagusto kang Mike apan wala usab magtagad ang lalaki niini.

Ang nakalahi lang tali kaniya ug kang Bernadith mao ang ilang paagi sa pag-handle sa sitwasyon. Si Bernadith walay kober-kober nga mipakitag gesture nga nakagusto kini kang Mike. Samtang siya naningkamot nga dili makapakita og bisan diyotay na lang nga timailhan nga nakagusto siya sa lalaki tungod kay dili siya gustong tawgon nga cheap nga pagka-babaye.

“Nganong ihatag man ko nimo ni Bernadith?” Sukit ni Mike taliwala sa iyang pagpakahilom. “Nagpasabot ba kini nga wala gayo’y paglaom ang akong gugma nga gihalad kanimo?”

Gitulon una ni Lonia ang pagkaon nga iyang giusap sa wala pa siya motubag.

“Dili sa ingon niana, Mike,” nagkanayon si Lonia nga kalit lang nakabunlot og maayong katarongan. “Dili lang ko gusto nga mangilog sa kalipay ni Bernadith. Nakamatikod ra ba ko nga uga siya’g tinagdan nako. Tingalig mosamot ang iyang kasuko nako tungod nimo.” -- Sumpayan pa