Lovers in Pari-an

Gula 78

Naputol ang pagmalandong ni Rosalinda dihang mitublaw sa kalikopan ang mananoy nga tingog sa sista nga ginuntan sa pagkanta ni Bongkoy. Gikanta na usab ni Bongkoy ang paborito niyang kanta nga “Somewhere Down The Road.” Mora’g bayawon si Rosalinda sa kapunawpunawan sa higayon nga makadungog siya sa maong awit.

Migawas siya sa iyang lawak katulganan ug mipaingon ngadto sa garahe nga maoy nahimutangan ni Bongkoy. Mitupad siya paglingkod sa ulitawo nga nagkugos sa sista ug nagpunay pagkuskos sa mga kuldas niini samtang nagkanta. Misandig siya sa abaga sa hinigugma samtang matagbawong namati sa giawit niini. Nahikalimtan niya sa makadiyot nga may problema silang giatubang.

Nahuman ang pagkanta ni Bongkoy sa “Somewhere Down The Road.”

“Ikaw na sab,” giawhag siya ni Bongkoy sa pagkanta.

“Duet lang ta,” ni Rosalinda.

“Unsa mang kantaha ang imong gusto?”

“Kanang You Are The Love Of My Life. Tubag-tubag man na sa lalaki ug babaye. Haom gyud na nato.”

“Sige.”

Ug mipasahe si Bongkoy. Unya nanganta silang duha. Maoy unang mikanta si Bongkoy. Dayon misunod si Rosalinda. Unya nagtubag-tubag na sila sa pagkanta. -- Sumpayan pa