Tuba nga bag-ong dawat maoy paborito ni Doroy ungo

Karong orasa sa kabuntagon andam na si Tikyo sa paghatod sa bag-ong dawat niyang tuba ngadto sa tindahan ni Nang Orang. Kining tindahan ni Nang Orang maoy suki sa mga manginomay og tuba. Naa kini mahimutang sa eskina gayod sa dalan probinsiyal nga molahos ngadto sa balangay sa Sangi.

Nindot man gud sab ang tuba ni Nang Orang nga gikan sa sanggotan ni Tikyo. Gawas pa usab sa tubang bag-ong dawat nga gikan ni Tikyo, duna poy mga bahalina si Nang Orang ug duna pud siya’y bahal.

Ug nakanindot ni Nang Orang kay lamian kaayo ang iyang suka nga gikan sa lina sa lubi. Ang lina mao ang tuba sa lubi nga wala pa kabutangi og tungog.

Ug kun madugay na kini mamahimo gyud kining lamiang suka. Ug ang taga sityo Uwang anha gyud mopalit sa tindahan ni Nang Orang og suka kay lami kuno kaayong isuka sa kinilaw. Apan ang labing manginomay og tuba dinhi sa balangay sa Sunoy mao si Doroy.

Halos kada adlaw sayo siyang moadto sa tindahan ni Nang Orang aron atngan ang bag-ong dawat nga tuba ni Tikyo. Ug karong buntaga nia na si Doroy sa tindahan ni Nang Orang ug nagtungab na sa baso nga may sulod nang tuba.

Usahay, dili siya mogamit og baso kay iya lang yarokon labi na’g uhawon siya’g maayo.

“Kada adlaw ka gyud moinom og tuba, no, Doroy,” ni nang Orang pa nga nakighinabi kang Doroy. “Mora seguro’g magluya ka kondili ka kainom og tuba. Pero, bag-ong dawat gyud ang imong gusto...”

“Oo, Nang Orang, bation nako ang katagbaw basta makainom na ko’g tuba nga bag-ong dawat,” ni Doroy pa usab nga mikulihad og unya nangluwa sa may nagtuhirig nga punoan sa buongon. Puwa usab ang iyang luwa tungod sa tuba nga iyang nainom. Unya...

“Grabe na gyud kaayo pagpanghasi sa Wakwak didto sa silingang baryo, da, Doroy,” ni Nang Orang nga nagsige’g takus sa suka nga iyang gibalhin sa mga botelya.

“Motuo sad ka anang ungo, Nang Orang?” Miigham si Doroy ug unya miyarok na pud sa tuba nga diha sa sulod sa baso.

“Aw, o, uy. Kay sa gamay pa kong bata nakakita gyud ko’g wakwak, Doroy. Gikaskas man gud ang among atop nga nipa niadto. Mao tong gilutos ni anhing tatay ang mangtas nga Wakwak, kay kun hiabtan pa ni tatay Ponyong nako, hayan matigbasan gyud tong Wakwaka...”

Mikalit lang og kagiki og katawa si Doroy. Mora’g nahimuot kini.

“O, katawa man lagi ka, Doroy. Unsa may kataw-anan sa akong gisulti? Mora’g nahibulong si Nang Orang nganong mikatawa pag-ayo si Doroy. “Dili kataw-anan ang ungo, uy, Doroy...”

“Bitaw, dili bitaw kataw-anan. Kining, Nang, Orang, ugma sa gabii anhi na dinhi sa atong baryo magsamoksamok ang Wakwak...” ni Doroy pa. “Anhi na to siya mamalbal...”

Taudtaod milakaw si Doroy sa tindahan ni Nang Orang. Tuod, nianang pagka-ingon ugma sa gabii, lanog kaayo ang tingog sa Wakwak ug didto kini mopaingon sa tindahan ni Nang Orang. Nanira na si Nang Orang apan gilungkab sa Wakwak ang tindahan sa tiguwang ug gihurot pag-inom ang tuba nga siyete Biyernes. Tungod niini, nagduda na si Nang Orang sa hilom kang Doroy basin og kini maoy Wakwak, kay apo ra ba kini siya ni anhing Simon, ang digungogdungog nga labing mangtas nga ungo dinhi sa ilang baryo kaniadto, dugay na karon.Nianang pagka-sunod ugma sa gabii, may butobuto sa pistola nga nabati si Nang Orang. Unya, naghangos si Tikyo manananggot nga nanuktok sa balay nilang Nang Orang ug misugilon nga si Doroy napusilan kay hiabtan nga namugno sa asawa ni Candoy Buogon. Matud pa si Doroy diay ang mangtas nga ungo nga didto ra mangabat sa silingan baryo ug karon nia na dinhi sa ilang baryo mangabat. (Kataposan)