Lovers in Pari-an

 Gula 75

“Abi mo, Hija,” gikan na usab sa abogado. “Kausa ra moabot ang suwerte sa tawo. Kun imong palabyon kining kahigayonan nga gitanyag ko kanimo, tingalig magmahay ka sa umaabot.”

Wala motubag si Rosalinda.

“Kining suwerte nga akong gitanyag kanimo,” ni Atty. Gumera pa, “dili kini mahitabo ngadto sa ubang mga babaye. Mao nga hunahunaa gyud kini’g maayo, Hija.”

Migawas dayon si Rosalinda sa lawak ni Atty. Gumera human sa ilang panagsulti. Apan nakugang siya. Iyang nakita diha sa tungod sa pultahan si Bongkoy. Namati diay kini sa panagsulti nila ni Atty. Gumera.

Gisenyasan siya ni Bongkoy nga dili pasabaon nga anaa siya sa tungod sa pultahan. Gihinay pagtak-op og balik ni Rosalinda ang palid sa pultahan dihang nakagawas na siya.

“Nganong nia ka man dinhi?” Hagawhaw ang tingog ni Rosalinda.

“Gusto lang kong makabati kun unsay inyong panagsultihan,” tubag ni Bongkoy.

Didto sila mopaingon sa garahe. Nagsulti sila’g maayo. -- Sumpayan pa