Idlas ang katumanan sa gugma

 Gula 71

“M-mao ba?”

“Mao kana ang matuod, Mike. Mao nga ayaw kahiubos. Kun mahimo hatagi pa ko’g dugang higayon sa pagtimbangtimbang sa imong proposition.”

“Okey. Magpaabot ko hangtod nga makadesisyon ka na. Panghinauton ko lang nga makalipay nako ang makab-ot mong hukom.”

Nagpasalamat sa hilom si Lonia nga nadala ra gayod si Mike sa iyang pagpasabot. Pagkaugma miadto si Lonia sa buhatan sa UCV Romances. Gi-submit na niya ngadto kang Rev ang unang nobela sa Kapalaran series nga nahuman na niya pagsulat. Gusto niyang mabasa dayon sa editor ang bag-o niyang nasulat nga nobela.

Igo lang gitunol ni Lonia ang iyang manuskrito ngadto kang Rev. Wala siya magdugay sa buhatan sa editor. Nanamilit dayon siya niini. Dili siya gustong magkasulti sila og dugay.

Paggawas niya sa buhatan sa editor gisugat siya ni Mike.

“Mopauli ka na?” Nangutana ang ulitawo.

“Oo,” mubo niyang tubag. “Gihatod ko lang kang Rev ang nobela nga nahuman na nako pagsulat aron iya na kining ma-edit.”

“Mao ba?”

“Oo. Ngano man diay?”

“W-wa man. Tuod, wa ka ba magdali?”

“Wa man hinuon. Ngano man unta?”

“Imbitahon ta unta ka og pangaon. Mahimo ba?”

“Nganong dili? Sige.” -- Sumpayan pa