Lovers in Pari-an

Gula 74

“Wa ka pa ba gihapon makadesisyon mahitungod sa akong gitanyag kanimo?” Sukna sa abogado.

Wala motingog si Rosalinda.

“Talagsaon ang kahigayonan nga gitanyag ko kanimo, Rosalinda. Kon pakaslan mo ako, seguradong mausab ang dagan sa imong kinabuhi. Matagamtaman mo na unya ang kaharuhay sa pagpuyo. Ikaw na unya ang rayna niining akong panimalay. Maangkon mo na unya ang tanang mga butang nga mapalit sa salapi. Lakip ang imong pamilya makatagamtam sa maangkon mong kabulahanan.”

Wala gayod motingog si Rosalinda. Nagpabilin siyang nagduko sa atubangan ni Atty. Gumera.

Mihukom na lang si Rosalinda nga magpakahilom. Nasayod siya nga bisan unsa pay iyang ipangatarongan, may rason usab si Atty. Gumera nga ikasukli niini. Lupigon gayod siya sa argumento niini.

“Kumosta ang relasyon ninyo ni Bongkoy?” Nangutana ang abogado.

“M-maayo man, Atorni,” mubong tubag ni Rosalinda.

“Gisuwerte lang si Bongkoy. Kun wa pa tingali ko niya maunhi, hayan dili ka maglisod paghukom bahin sa akong gitanyag kanimo.”

Wala na usab motingog si Rosalinda. -- Sumpayan pa