Gula 70
Naghinuktok si Lonia sa atubangan ni Mike. Nangita siya’g maayong katarongan nga dili ika-offend niini. Dili pa siya andam nga modawat sa gugmang gihalad ni Mike kaniya tungod kay wala pa siya makaseguro mahitungod sa iyang gibati ngadto niini.
Kun si Rev pa hinuon tingali ang nangulitawo kaniya, hayan dili na malangan. Makapanaog dayon siya sa iyang hukom kay natino na man niya kun unsay iyang gibati ngadto kang Rev.
Sa laing higayon, napaso ang iyang hunahuna nga nahinumdom kang Rev. Ngano ba gayod nga mosantop man si Rev sa iyang hunahuna bisan dili niya tuyoon? Sa hilom naglagot siya sa iyang kaugalingon.
Si Mike ang iyang gikasulti apan si Rev ang diha sa iyang hunahuna. Unfair kini sa dapit ni Mike ilabi na nga nangulitawo kini kaniya. Hinuon, wala man masayod si Mike nga si Rev ang iyang gihunahuna. Apan maskin na. Dili na gayod angay nga maghunahuna pa siya kang Rev.
“Lisod ba kong higugmaon, Lonia?” Misukna si Mike aron pagtikdol sa taudtaod na niyang pagpakahilom.
“Ng-ngano bang nakapangutana ka man og ingon niana?” Misumbalik sa pagpangutana si Lonia nga mikunot ang agtang samtang mitutok sa ulitawo.
“Mora man gud og naglisod ka sa paghukom,” may lama sa kahimangod nga nag-umog sa tono sa sinultihan ni Mike.
“Tinuod nga naglisod ko sa paghukom, Mike,” pag-angkon ni Lonia. “Pero dili tungod kay lisod kang higugmaon kun dili tungod kay wala pa ko’y kasinatian bahin sa gugma. Wala pa ko makasuway nga makabaton og boyfriend?” -- Sumpayan pa