Lovers in Pari-an

Gula 72

“Wala ka niya pakyasa sa dihang nanghanyo ka kaniya,” gikan na usab ni Bongkoy. “Makahimo ka kaha usab sa pagpakyas kaniya sa higayon nga siya na usab ang mohangyo og pabor gikan nimo?”

“Bahala na ni,” ni Rosalinda pa.

“Unsay bahala na ni?”

“Wa pa ko masayod sa angay kong buhaton kun muabot man ugaling kanang maong higayon. Basta dili ko magpakasal niya.”

Gipatawag na usab ni Atty. Gumera si Rosalinda. Si Tasing ang gisugo sa abogado sa pagpahibalo kaniya. Si Atty. Gumera nagpaabot kaniya didto sa lawak niini, matud pa ni Tasing.

‘Di ko, Nang, uy,” ni Rosalinda pa. “Nganong adto man gyud sulod sa iyang lawak siya makigsulti nako?”

“Ambot lang,” ni Tasing pa. “Basta mao nay iyang gisulti nako.”

“D-di lang tingali ko moadto, Nang, uy.”

“Unya? Tingalig masuko si Atorni nimo?”

Wala motingog si Rosalinda.

“Adtoa lang gud,” matud ni Tasing, “aron imong masayran ang iyang tuyo.”

“M-mahadlok man ko, Nang,” ni Rosalinda.

“Unsa bay imong kahadlokan?”

“T-tingalig...”

“Tingalig unsay buhaton ni Atorni nimo, mao ba?” -- Sumpayan pa