Mga bitoon diha sa kangitngit

Nagka-uyab sila si Don ug Caty pinaagi lang sa mga sulat. Gitakda ang ilang kasal bisan wala pa sila magkita.

Pareho silang nakalitan sa ilang kahimtang ug sa ilang bayhon sa dihang nagkita na sila. Apan kadiyot lang kay malipayon silang nagakos.

Sa unang gabii human sa ilang kasal, "Nahadlok ko basin di ko makahimo," matud ni Don. Miyango lang si Caty, agi og pagdasig, busa mipuwesto si Don aron sugdan ang ilang kombate. Nahuman gyud ang seremonyas, bisan monas ginhawa ug human makapaboto, pareho silang gikutasan.

Sa paglabay sa mga tuig, nakadaginot gyud sila og duha, pulos lalake ug kaluha kini. Sila mao si Leon ug Noel nga mga ulitawo na ug parehong mga propesyonal.

"Kinahanglan nga ipadali ang shipment," matud ni Don nga usa ka batid nga magsusulat nga adunay kaugalingon nga publikasyon nga gidumala ni Leon. "Ug gusto usab ni mama ninyo nga ipadali kadtong condo alang sa mga dis-able ug ang ekspansiyon sa eskuylahan."

Si Caty, usa ka psychologist nga dunay foundation nga ang mga development projects niini gidumala ni Noel. Usa ka adlaw sa gihimong graduation sa mga dis-abled, mitambong sila Don ug Caty isip mga pinasidunggang mga mamumulong.

Samtang sila naglingkod, nahanduraw ni Don ang mga sulat ug e-mail gikan sa mga nangaging graduates nga mga malamposon ug atua na sa laing nasud manarbaho ug nanimuyo.

Naputol ang iyang paghanduraw sa dihang gitawag silang duha ni Caty nga pasak-on sa entablado. Si Don ang namulong, "Mapasalamaton ako nga human sa makutas nga mga pailob, nakab-ot ra gayud ang gimithing katumanan sa damgo. Apan ayaw ninyo kalimti nga bisan iwag kini sa inyong kaugmaon, iwagi usab sa kahayag ang anaa sa kangitngit."

Mibarog ang tanan ug milanog ang mga pakpak sa pagdayeg nga kini gitambongan sa mga opisyales sa kagamhanan ug mga foreign dignitaries.

Natala sa Hall of Fame sila Don ug Caty. Si Don nga sukad sa pagka-bata, usa ka biktima sa polio, samtang si Caty, sukad sa pagka-tawo, usa ka amang.