Lovers in Pari-an

Gula 71

Dinhing bahina nga wala na makatingog si Rosalinda. Unsa man kaha tuod ang iyang buhaton sa higayon nga matinuod ang pangagpas ni Bongkoy? Mapugos kaha siya sa pagpakasal ngadto ni Atty. Gumera? Magmalipayon kaha siya sa pagpakigtipon sa lalaki nga wala niya higugmaa?

Karon pa siya makaamgo nga nahisulod diay siya sa dakong laang sa suliran. Wala kini mahunahuna niya kaniadto tungod kay maoy naglabi sa iyang hunahuna ang kaluwasan sa iyang amahan. Ang importante alang kaniya niadtong higayon nga nangutang siya’g kuwarta ni Atty. Gumera mao nga natambalan ang iyang amahan ug dili kini mainutil sa hingpit.

Wala gayod siya magdahom nga posible diay’ng mosangko sa dakong suliran ang iyang pagsulod sa dakong utang kang Atty. Gumera.

“Hinumdomi, Ros,” ni Bongkoy pa, “nga interesado kaayo si Atty. Gumera nga iya kang maasawa. Karon nga nakautang ka na kaniya’g dakong kantidad ug ingon man utang kabubut-on, siya nay nakapabor sa sitwasyon.”

Wala motingog si Rosalinda. Natimbangtimbang niya nga husto ang gipagawas nga mga argumento ni Bongkoy. -- Sumpayan pa