Managsamang binilanggo

Samtang namalit si Josie og mga utanon sa Carbon sayo sa buntag, “Miss, nahulog ang imong pitaka,” matod sa usa ka ambongan nga lalaki.

 “Ha! Uy, salamat kaayo Sir. Wa na ra ba gyud koy laing kuwarta,” tubag ni Josie nga gikulbaan.

Tungod niadto, nagka-ilhanay ang duha ug nagkuyog pagpauli ni Josie sa balay nga iyang gipuy-an, Kuwarto lang ang gipuy-an ni Josie kay siya ra mang usa.

“Pasensiyahan mo na kining gamay kong gipuy-an, Glenn kay ako ra mang usa.”

“Pareho man diay ta og gipuy-an kay kuwarto man lang sab ang akoa. Taga diin ka man gyud, Josie?”

“Taga Iligan ang akong mga ginikanan pero duha ka tuig na man silang patay ug wa koy lain nga igsoon busa naningpalad na lang ko dinhi sa Cebu basin makakita og maayong trabaho. Ikaw diay, Glenn, taga diin man sad ka.”

“Taga Bohol intawon ko Day.”

“Nganong intawon man?”

“Mao man nay kadaghanan isulti sa taga didto kon naay mangutana. Pareho gyud ta’g kapalaran kay nia man sab ko aron lang manimpalad.”

Pila lang ka semana ang milabay, nagka-uyab ang duha. Miabot og usa ka tuig ang ilang panag-uyab ug igo lang sila sa paghinagkanay nga lips to lips ug wala sila’y seryoso nga date. Apan usa ka higayon, “Josie, magpakasal na lang ta,” misugyot si Glenn.

“Nabalaka ako Glenn, kay tingali og magmahay ka kun magminyo ta.”

“Ngano man, unsa may hinungdan nga magmahay ko, nga mahal ko man ikaw ug mahal mo usab ako.”

“Duna man gud koy sekreto nga wa nako isulti nimo kay basin mawagtang ang imong pagmahal nako .”

“Pareho diay ta. Duna man sab koy sekreto nga wa nako isulti nimo.”

“Kun magdinayganay kaha ta sa atong sekreto karon, unsay imong ikasulti?” mipadayag si Josie.

“Sige, ikay una.”

“Nabilanggo ako nga walay kasal-anan, Glenn.”

“Ha! Unsang hitaboa?”

“Lalaki ako Glenn nga nabilanggo sa lawas sa usa ka babaye.”

“Pareho gihapon ta, Josie kay babaye ako nga nabilanggo sa lawas sa usa ka lalaki.”

“Walay problema, Glenn, idayon nato ang atong kasal ug tumanon nato ang tulubagon sa usa’g-usa.”

Nadayon ang kasal sa duha ug nagka-anak gyud sila og kaluha.

Sa nangadagko na ang duha ka bata, ang babaye, lakin-on ug ang lalaki, bayot. (Katapusan)