Lovers in Pari-an

Nasemento gayod ang paa sa amahan ni Rosalinda. Si Atty. Gumera ang miabaga sa mga galastohan niini sa tambalanan. Giatiman pag-ayo sa mga doktor si Noy Andres, ilabi na nga giangkon ni Atty. Gumera nga siya’y tagtungod sa pasyente.

Dihang nakagawas na si Noy Andres sa tambalanan, ingon sa inanay nga mibalik sa normal ang kinabuhi ni Rosalinda. Si Atty. Gumera wala gayod maghisgot bahin sa iyang utang ngadto niini.

Apan nasubo si Bongkoy sa maong hitabo. Ang kadako sa nautang ni Rosalinda ngadto ni Atty. Gumera nakapabalaka pag-ayo sa ulitawo.

“Mabayran ra lagi na nako,” matud ni Rosalinda. “Silbihan ko si Atty. Gumera hangtod nga maimpas nako pagbayad ang akong nautang.”

“Dili kana maoy akong gikabalak-an, Ros,” ni Bongkoy.

“U-unsa man diay?”

“Karon nga nagapos ka na sa utang ni Atty. Gumera, malagmit dili ka na makabalibad kun unsay iyang pangayoon diha nimo.”

“Unsay buot mong ipasabot?”

“Tingalig pugson ka na niya sa pagpakasal kaniya bugti sa dakong kantidad nga imong nautang.” -- Sumpayan pa