Hukom

Wala na dinhi ang imong asawa, Dong Eric. Milayas siya ug kauban niya sa iyang paglayas ang iyang kabit!" Daw bomba kasipa ang tingog ni Mama Nilda nga mitubag dihang gipangutana ko siya kabahin sa akong asawa. Gikan pa man god ko sa trabaho ug wala na ang akong asawa sa akong paghiuli.

Midali ko’g sulod sa lawak namo ni Juvy ug giabli ko ang aparador. Unya milurat akong mga mata dihang wala na sa sulod sa aparador ang mga sinina sa akong asawa. Daw gikumot ang akong dughan sa tumang kaguol nga migawas sa lawak.

"Pangitaon ko ang akong asawa, Ma!" Nako pa dayong lakang paingon sa gawas sa balay.

"Pasagdi kadtong walay bili mong asawa, Dong Eric!" May sambog nga kapungot ang tunada sa tingog sa akong inahan, "Hikalimti na siya. Pangita’g babaye nga anak usab og sapian!"

"Dili ko mahimong hikalimtan si Juvy, Ma! Gimahal ko ang akong asawa ug dili ko buot nga mawala siya sa akong kinabuhi!" Nako pa nga nagpamahid sa mga luha nga misugod na sa pag-agas gikan sa akong mga mata.

"Bugo ka, Eric... bugo ka kaayo!" Banghag na usab ni Mama Nilda. "Hunahunaa pag-ayo kun unsa ang kalidad niadtong imong asawa. Dili siya angayan kanimo. Engineer ka, Dong, samtang si Juvy wala gani makatapos sa hayskol tungod sa pagka walay nahot! Dili sama kaniya ang gusto kong mahimong umagad!"

Mihilom ko. Dili ko mahimong tubagon pa ang akong inahan kay pinangga ko siya ug dili ko buot nga masilo siya nako. Milakaw ko nga walay tingogtingog ug migawas sa balay. Ug gipunting dayon sa akong mga lakang ang suki kong tindahan nga nahimutang atbang sa among balay. Mipalit kog bino ug pagkatapos milakaw ko paingon sa balay sa suod kong higala ug silingan nga si Gogo. Si Gogo lamang maoy bugtong kong madangpan ug kapangayoan og tambag sa matag higayon nga mohasi na kanako ang problema.

"Dayon ngari, Bay!" Timbaya ni Bay Gogo dihang nahiabot na ko sa ilang tugkaran. "Morag may problema ka na sab da!"

"Duna gyod...." Tubag ko dayong sulod sa ilang sala ug milingkod sa sopa. Ug gisugdan dayon namo ni Bay Gogo pagtagay ang dala kong bino nga maoy among paborito. "Naguol kaayo ko ning kalit nga paglayas sa akong asawa, Bay Gogo. Wa man unta mi magkaaway pero nahimo gyod niya ang pagbiya nako. Ug matud pa ni Mama Nilda, may kuyog pa gyod siyang lalaki!"

"Ayaw pagtuo sa gisulti sa imong inahan, Bay, nasayod ka na gyod nga wala maayoni ni Nang Nilda si Juvy ug gusto siyang magkabulag mo!" Gipuypoy ni Bay Gogo ang akong kasubo, "Wala na tingali makaagwanta ang imong asawa sa daw hayop nga pagtratar kaniya sa imong inahan maong milayas!"

Nanghupaw ko. Unya miyarok ko sa bino nga gitagay namo ni Bay Gogo. Ug miyarok pa gyod ko sa makadaghan sa tuyo nga lumsan ang akong kaguol. "Yuna pa, hain mandiay ang imong asawa, Bay, nga ikaw ra man ang nia karon sa inyong balay?"

Mitutok kanako ang akong higala ug unya mipahiyom siya samtang midimdim sa bino gikan sa gikuptan niyang baso. "May gilakaw pa ang akong asawa, Bay Eric. Giubanan niya ang iyang amiga sa pagpangita og balay nga paabangan. Ug miteks siya nako kaganina nga may nakita na silang bakanteng balay. Nia na sila dinhi paingon!"

Igo gayod nga nahurot namo ni Bay Gogo ang bino nahiabot usab ang iyang asawa ug may kauban kining babaye. Nakapahiyom ko dihang akong nasuta nga si Juvy kini. Giduol ko dayon si Juvy ug gigakos sa tumang kahinangop.

Ug dihadiha akong nahinumdoman ang hangyo ni Juvy di pa lang dugay nga molain na kami sa pagpuyo. Ning higayona, natibuok ang akong hukom. Unya sa pagpauli namo sa balay sa akong ginikanan sultihan ko si Mama nga mobalhin na kami sa pagpuyo ngadto sa balay paabangan nga nakaplagan ni Juvy mao unyay mahimong salag sa among gugma. Ang balay nga dumalahon namo ni Juvy ug wala na unya’y magbuot sa gusto namong buhaton! (Kataposan)